admin
SHAsha yemujaho wekusvetuka pamwe nekumhanya, Katarina Johnson-Thompson uyo ange ari pazororo mushure mekukuvara kwaakaita, anoti acharwira mukombe kumakwikwi eBritain Indoor Championships.
Aka ndekechipiri achikwikwidza kubva zvaakakuvara gumbo zvinova zvakaita kuti atadze kupinda mumakwikwi eCommonwealth Games pamwe nemaEuropean Championships gore rakapera.
Chizvarwa chekuBritain, Johnson-Thompson akasvetuka zvinodakadza gore rakapera uye achange achikwikwidzana nechizvarwa chekunyika yake zvakare Isobel Pooley pamwe naMorgan Lake musi weMugovera svondo rino. Johnson-Thompson anoti achapinda mumakwikwi ekumhanya pamwe nekusvetuka ayo achange achiitirwa kuSheffield. Shasha yekusvetuka, Johnson-Thompson, akahwinha makwishu eWorld Indoor muna Kurume gore rakapera uye zvakare ndiye shangwiti yakadadisa pane dzimwe dzose zvisinei nekukuvara kwaainge akaita. Akadzoka kuzopinda mumakwikwi kekutanga kubva paakakuvara apo akaita mwedzi mitanhatu akazorora uye akatamba zvinodadisa.
Johnson-Thompson achatora mukana wakavhurwa nemijaho yakadai seyemusangano weSheffield pamwe neBirmingham Indoor grand prix musi waKukadzi 21 kuPrague.
Vamwe vatambi vari kukwikwidza kumakwishu achaitirwa kuBirmingham aya vanosanganisira Mo Farah pamwe naJames Dasaolu.
Zvakadaro, Johnson-Thompson akambohwina makwikwi akadai seWorld Junior Champioships muna 2012 apo akatora menduru yegoridhe, European Championships akatora menduru yegoridhe zvakare pamwe neWorld Indoor Championships apo akawana menduru yesirivha.
Online Reporter