Kukanga mutetenerwa

NZUNGU chirimwa chakakosha zvikuru sezvo dziine kudya kunovaka muviri semapuroteni. Nzungu dzinogona kudyiwa dziri nepakawanda — dziri nyoro, dovi riri muusavi kana mubota, gwatakwata, mumhare kana kukanga kuita mutetenerwa.

Kune nzira dzakasiyana dzekubika kana kukanga nadzo nzungu zvichienderana nesarudzo yemunhu.

Nyanzvi mune zvekukaringa muHarare inozivikanwa saMai Mupositori inotsanangudza makangirwo anoitwa mutetenerwa, munhu agonakirwa zvekuti anodzikisa jomupii rose rizere mvura.

KUGADZIRA:

Mutetenerwa inzungu dzakaoma uye dzikamenywa ndokukangwa dziine munyu. Mutetenerwa haunetsi kugadzira. Chekutanga unofanira kuona huwandu hwenzungu dzako nepoto kana hari yauri kuda kukangira uye kuti dzisawandise unoisa shoma-shoma, ndiko kuti dzisazotsva. Poto kana gango racho rinofanira kunge rakachena. Unoisa nzungu dzakafanira mupoto wodzikanga kusvika dzaibva.

ZVOZODINI?

Dira mvura shomanana inenge iine munyu wakanyungudika nekuti ukakanda munyu wakadaro unokundikana kunyungudika vanhu vozoutsenga pakudya. Ramba uchikanga kusvikira nzungu dzisisina mvura wozodzibura. Unogona kudziisa mutsero kana mundiro wakadziparadzira kuti dzinyatsooma zvakanaka.

UNODYA NEI?

Mutetenerwa unogona kudyiwa nesadza kana wakadaro mushure mekudya zvimwe sedhizeti.