Online Reporter
Kingstone Mapupu
MAKOROKOZA maviri, Tinotenda Mushoriwa (35) naChristine Ngwarai (49) vakasungwa nemhosva yekuponda munhu pane mumwe mugodhi uri kuKwekwe.
Detective Inspector Rachel Muteweri vanova mutauriri wemapurisa ematikitivha echikamu cheCriminal Investigations Department (CID) vanoti nemusi wa15 Chikunguru nenguva dza10 husiku, vaviri ava vakanetsana nemumwewo munhu pamugodhi uyu vachibva vatanga kurwisana.
“Panguva yavairwisana iyi, vaviri ava vakanhonga matanda ndokutanga kurova nawo mumusoro memuchakabvu uyu zvakaita kuti afende uye achibva afa ipapo.
Vaviri ava vakabva vatiza vaona kuti vakanga vapara mhosva,” vanodaro Det Insp Muteweri.
Vanoti nyaya iyi yakamhan’arwa kumapurisa apo Mushoriwa naNgwarai vakabva vasungwa uye vakamirira kupinda mumatare edzimhosva.
Mune imwewo nyaya, Godfrey Smart (31) naJorum Rukara (32) vakasungwa kuKaroi nekuda kwemhosva yavari kupomerwa yekuponda.
“Zvinonzi nemusi wa14 Chikunguru gore rino, mumwewo munhu aitsvaga huni musango remapuranga akaona mutsetse weropa mukamugwagwa kanobva kunzvimbo yemabhizimisi yeChinyere kuKaroi. Pakuramba achifamba, munhu uyu akazoona mutumbi wemunhu mukati mesango iri achibva anomhan’ara kumapurisa,” vanodaro Det Insp Muteweri.
Vanoti mukufeewa kwenyaya iyi, mapurisa akazokwanisa kusunga Smart zvakazoitawo kuti vasunge zvakare Rukara.
“Zvakabuda pachena kuti nemusi wa13 Chikunguru nenguva dza2100 hours, vaviri ava vainwa doro mubhawa repanzvimbo yemabhizimisi yeChinyere vaine mufi uyu. Vanonzi vakazotanga kunetsana nenyaya isina kuzivikanwa vachibva vamuponda ndokunokanda mutumbi wake musango remapuranga uko wakazowanikwa usina kupfeka,” vanodaro Det Insp Muteweri.
Vaviri ava vakatopinda mudare redzimhosva reKaroi Magistrates Court nyaya yavo ndokudarikidzwa mberi uye vachadzoka zvakare mudare nemusi wa29 Chikunguru.
Mapurisa ari kurumbidza veruzhinji nekuramba vachivapa mashoko anoita kuti vasunge nhubu dziri kupara mhosva dzakasiyana-siyana nenguva uye dzichiendeswa kumatare edzimhosva.
