Online Reporter
Kingstone Mapupu
MUNYAYA inotaridza kusimbaradzwa kwekurwisana nekushandiswa kwezvinodhaka munyika, dare reBeitbridge Regional Court rakatongera James Vengesai (43) wekwaRukweza 2 kwaChirumhanzu kuti agare mujeri kwemakore makore 15 nekuda kwemhosva yekuwanikwa aine zvinodhaka.
Vengesai akasungwa nemusi wa2 Chikunguru gore rino apo chikwata chemapurisa nevamwe vabati vezvemutemo vaishanda pamwe chete kutsvaga nhubu dzinopara mhosva dzekuyambuka miganhu yenyika zviri kunze kwemutemo pasi pechirongwa chinodaidzwa kuti: “No To Cross Border Crimes”.
Mutauriri wemapurisa echikamu chematikitivha cheCriminal Investigations Department (CID), Inspector Rachel Muteweri, vanoti mapurisa akamisa Vengesai ndokumusecha vakamuwana aine mbanje inorema makg 54,343 achibva asungwa.
Vengesai akazomiswa pamberi pemutongi Mai Charity Maphosa apo akapihwa chirango chekugara mujeri kwemakore gumi nemashanu nekuda kwemhosva iyi.
Det Insp Muteweri vanoti mune imwe nyaya inodyidzana neiyi, Evelyne Pika (47) wemumugwagwa waJongwe kuMufakose muHarare akapindawo mudare rimwe chete iri api akawanikwa aine mbanje yairema makg 31, 650 akapihwa chirango chekugara mujeri kwemakore masere.
Vanoti nyaya dzekushandiswa kwezvinodhaka dziri kuramba dzichiwanda munyika.
“Zvinoda kushandirapamwe weruzhinji nemapoka ose neHurumende mukurwisana nekutorwa kwezvinodhaka. Tinorumbidza matare edzimhosva nekuramba achipa zvirango zvakaomarara kuvanhu vose vanobatwa nemhosva yekutengesa zvinodhaka kana kuwanikwa vainazvo,” vanodaro Det Insp Muteweri.
