adminSANGANO rinomirira vanamujibha nanachimbwido, reZimbabwe Liberation War Collaborators Association (ZILIWACO), riri kukurudzira kuti mapfupa evaiva varwi vehondo yerusununguko rweZimbabwe vakafira kumatunhu akasiyana, ayo asati avigwa zvine mutsigo, afukunurwe agovigwezve kunzvimbo dzakakodzera.
Mashoko aya akataurwa pamusangano wakaitirwa panzvimbo yemabhizimisi yekwaNyamweda, kuMhondoro, munguva pfupi yadarika.
Vachitaura pamusangano uyu, ZILIWACO political commissar, Cde Shain Chakanyuka, vanoti zvakakosha kuti mapfupa evaive varwi vehondo yerusununguko avigwe zvine chiremerera.
“Sekuno kuMhondoro kwakarwiwa hondo yeChimurenga yakasunungura nyika, tine magamba akarara muno ayo ndakakumbirwa nevabereki vemuno kuti afukunurwe mavarere vonovigwa patsva kungava kumisha yavo kana munzvimbo dzinovigwa magamba. Hurongwa uhwu tichahusvitsa kumusoro,” vanodaro Cde Chakanyuka.
Vanoti ivo semumwe akarwira mudunhu reMhondoro nekune mamwe matunhu, vane ruzivo rwemamwe magamba akafira mudunhu iri.
“Tine chitsvambe sanamujibha nanachimbwido kuno kuMhondoro, kuti vamwe vedu vatairwa navo vakafa tichiona vanofanirwa kuti vafukunurwe mapfupa avo anovigwa zvakatsiga kuti mweya yavo izorore.
“Tine sangano reFallen Heroes Exhumers Association kana kuti Fallen Heroes Trust saka tinoda kushanda naro kuti tivige magamba edu zvakanaka. Hatibatsiranei tose kuno, tinoziva pavarere nekuti taiva navo,” vanodaro Cde Chakanyuka.
Online Reporter