adminGabriel Singano
VAMWE Mai Mufundisi vakazopotera kudare redzimhosva vachiti vaoneswa chitsvuku nemurume wavo uyo anovati muroyi uye vanoda kupedza vana vavo nekuvadya.Sarah Chigwada akachema-chema mudare reHarare Civil Court achiti ashaiswa rugare naGideon Richardson.
Anoti vave nemakore 26 varoorana uye vakaita vana vose asi iye zvino murume wake mufundisi ave kumupumha huroyi.
Mai Mufundisi vakaudza mutongi wedare iri kuti: “Changamire, murume wangu neni tava nemakore makumi maviri nematanhatu tiri tose uye tine vana vedu vana. Murume wangu ava kunditi ndiri muroyi achitora vana ava achinovachengetesa kuhama dzake achinditi ndingavapedze nekuvadya. Vana vandakabereka?
“Ndinokumbirawo kudzivirirwa kuti murume wangu asarambe achitaura mashoko ekuti ndinoroya vana vangu vandakabara ini.
‘‘Dai ndaida kuvadya ndingadai ndisina kuvapedza vari vadiki here? Ngaasiyane zvakare netsika yokunditorera vana vangu achichengetesa hama dzake. Dai aratidzawo kuti mufundisi, asaita zvinhu zvinoshoresa zita raMwari,” akadaro.
Richardson haana kupokana nechikumbiro chemukadzi wake.
Mutongi Barbra Mateko akapa gwaro redziviriro kuna Chigwada ndokuti vaviri ava vanofanira kutaurirana murunyararo semurume nemukadzi.
Online Reporter