Online Reporter
Kingstone Mapupu
MAKORORO maviri — Joseph Mafondokoto naKudakwashe Mafondokoto — vanove mukoma nemunin’ina vemumusha waSabhuku Chikwanda kwaMambo Mutema, kuChipinge avo vakange varura nekubira veruzhinji midziyo nezvimwe zvinhu zvakasiyana-siyana, vakatongerwa kugara mujeri kwemakore 43 pamumwe nemumwe wavo.
Vaviri ava vakamiswa mudare reChipinge Magistrates Court ndokuwanikwa vaine mhosva nomwe dzekuba kunzvimbo dzakasiyana.
Mutauriri wemapurisa echikamu chematikitivha cheCriminal Investigations Department (CID), Detective Inspector Rachel Muteweri, vanoti vaviri ava nevamwe vavo vanoti Chakanetsa Mafondokoto naTinashe Mashava, avo vasati vabatwa, vakashungurudza veruzhinji nekuvabira kuChipinge nedzimwe nzvimbo dzakapoteredza.
“Makororo aya ainanga madzimai kunyanya nevemabhizimisi vachisvikovavhundutsira vachivabira midziyo yakasiyana vachishandisa mabhemba nesimbi uyewo nerekeni. Mune imwe nyaya nemusi wa26 Gumiguru gore rino, makororo aya akasvika pane imwe mhuri ndokuivhundutsira vachiti vaida mari nemimwe midziyo apo vakatora welding machine, compressor uyewo nemari,” vanodaro Det Insp Muteweri.
Vanoti chikwata chimwechete chemakororo aya nemusi wa12 Mbudzi chakanopwanya chimwe chitoro ndokubira mudzimai muridzi wechitoro ichi midziyo yakasiyana pamwechete nemari.
“Zvinhu zvakabiwa zvinosanganisira magirosari, mbatya, bhutsu, zvinwiwa, nemidziyo yemagetsi. Vachangopedza kuba panzvimbo iyi, vakaenda ndokunoba pamwe zvakare midziyo yakasiyana. Mapurisa aiva pabasa vakazoona chikwata ichi apo vaviri vemakororo ava vakatiza asi vamwe vaviri vavo vachibva vabatwa,” vanodaro Det Insp Muteweri.
Vanoti pakasungwa vaviri ava, pakabva pawanikwa midziyo yakasiyana.
Vakazomiswa pamberi pemutongi VaRobson Chineka veChipinge Magistrates Court apo mumwe nemumwe wavo akapihwa chirango chekugara mujeri kwemakore 43.
Zvakadai, mapurisa ari kutsvaga vamwe vaviri vakatiza uye anokurudzira veruzhinji vangave neruzivo nekwavari kuti vabatsire nemashoko anokwanisa kuita kuti vasungwe.
Vane zvavanoziva munyaya iyi vanokurudzirwa kuridza nhare panhamba dzinoti 0773 035 028 kana kuzivisa mapurisa ari padyo navo.
