Online Reporter
Fungai Lupande
MURUME ane makore 28 okuberekwa wekuBindura anova mukurokoza akamiswa mudare nemhosva yekuwanikwa aine madeheny’a maviri evanhu, mapfupa pamwe chete nevhudzi zvaive zvakasanganiswa neivhu zvakaputirwa nemachira eretso.
Alfred Chinjiva ari kupomerwa kufukunura guva remudzimai akangozivikanwa nekunzi Erita kuBindura ndokutora deheny’a nemamwe mapfupa
Akamiswa mudare reBindura Magistrates Court achitarisana nemhosva yekukanganisa guva.
Chinjiva akasungwa nemusi we2 Kukadzi mushure mekubatwa aine pfuti yemanyepo panzvimbo yeKitsiyatota.
Zvichitevera kusungwa kwake, mapurisa akabva aenda naye kumba kwavo kuChipindura Park, apo vakazowana madeheny’a maviri nemapfupa emunhu.
Mapurisa akawana madeheny’a maviri aya akaputirwa nemachira eretso, mapfupa aive mumabhaketi uye mamwe mabheketi aive nevhu rakasanganiswa nemapfupa nevhudzi.
Mapurisa ari kuenderera mberi nekuferefeta nyaya iyi kuitira kuti chokwadi chaicho chezvakaitika chigobuda.
Chinjiva anotarisirwa kudzoka kudare munguva pfupi inotevera.
