Online Reporter
Muchaneta Chimuka
VAGARI vekuMkoba, kuGweru, vari kuita muonerapamwe nemapurisa mukuferefetwa kwenyaya yeumhondi yakaitika paMkoba 6 Shopping Centre, apo murume ane makore 43 okuberekwa akabaiwa nebanga ndokufa, mupari wemhosva iyi achibva atiza.
Assistant Inspector Xolani Dube, avo vakafanobata chigaro chemutauriri wemapurisa mudunhu reMidlands, vanoti nyaya iyi yakaitika nomusi wa29 Mbudzi gore rino, apo Daniel Mbuta (43), wekuMkoba, akawanikwa arere muvheranda rechimwe chitoro achitaridza kuti airwadziwa zvakanyanya.
“Akange arere mudziva reropa ari muvheranda repaMkoba 6 Business Centre kuma0300 hours apo mumwe munhu aitozvifambirawo akamuona, achibva adeedza amburenzi asi yakazosara kusvika iye atofa nechekare,” vanodaro Asst Insp Dube.
Vanoti nyaya iyi yakamhan’arwa kumapurisa uye nzvimbo yakaitikira umhondi uhwu yakashanyirwa pachiitwa ongororo.
“Mutumbi wake wakaonekwa une mavanga akawanda ekubaiwa nebanga, uchibva waendeswa kumochari yeGweru Provincial Hospital kunovhenekwa uye ongororo ichiri kuenderera mberi,” vanodaro.
Asst Insp Dube vanoyambira voruzhinji vangave neruzivo maringe nefiro yaMbuta kuti vazivise mapurisa ari pedyo navo, uye vanoshora zvikuru nyaya dzemhirizhonga sezvo dzisingaunzi budiriro muraramo yevanhu.
