Online Reporter
Solomon Bhumu
MUSHURE mekurwadziswa nemudikanwi wake, murume ane makore 48 ekuberekwa wekuNyanga akazvisungirira pamusha peshamwarikadzi mushure mekunge yati haichamuda.
Vakafanobata chigaro chemutauriri wemapurisa mudunhu reManicaland, Assistant Inspector Wiseman Chinyoka, vanotsinhira nezverufu rwaZealot Nyagato wekuNyajejezi kwaMambo Saunyama, kuNyanga.
Asst Insp Chinyoka vanoti Nyagato akashanyira shamwarikadzi yake, Alice Museta (47), kumba kwake nomusi wa15 Gumiguru munguva dzemasikati apo vakasvikotadza kunzwanana mukutaudzana.
Izvi zvinonzi zvakaita kuti Museta ange achifunga kugura rudo rwainge rwuri pakati pavo zvinova zvakasiya Nyagato aine ronda pamwoyo.
Museta anonzi akabva pamba apa achibva aenda kuCharamba Business Centre apo Nyagato akasara akagara panze padyo neimba yekubikira akamirira kuti Museta azodzoka asi haana kudzoka.
Ave manheru, vana vaMuseta vanonzi vakabika chikafu vachibva vapa Nyagato asi akachiramba.
Vana ava vanonzi vakaenda kunorara vachisiya Nyagato ari panze.
Ave mangwana mangwanani kuma5am, vana ava vakamuka vakabika chikafu chavo kuti vange vachienda kuchikoro asi vakashamisika kuona Nyagato akarembera mumuti mushure mekuzvisungirira.
Vana ava vanonzi vakabva vazivisa muvakidzani wavo anonzi Edith Kennedy anova akabva azoudza Museta.
Nyaya iyi yakamhan’arwa kumapurisa ekuNyanga vanova vakauya vakabvisa mutumbi uyu ndokuuendesa kuNyanga District Hospital.
Ongororo yakaitwa pamutumbi uyu yakataridza kuti Nyagato akafa kuburikidza nekuzvisungirira.
