Online Reporter
Kingstone Mapupu
MURUME wemakore makumi matatu okuberekwa anogara kwaMasona, kwaSeke, anoti shungu dzake dzekunodzidzira basa remaoko paHarare Polytechnic dzakaenda mudondo mushure mekungoerekana apofomara mukati menguva pfupipfupi achangovamba zvidzidzo zvake.
VaOnisimo Tambure, avo vaimbogara kuMabvuku, kwavaiita zvebhizimusi rekutengesa girosari nezvimwe, ndokuzobhuroka, vanoti vakatsvaga nzvimbo pachikoro chikuru ichi mugore ra2020, vachida kuita zvidzidzo zveconstruction engineering, vachibva vawana nzvimbo yacho.
Vanoti mushure memasvondo maviri vatanga zvidzidzo izvi vakabva vangotanga kuona mhute vari muchikoro.
Murume uyu anoti ziso rake rekurudyi ndiro rakatanga kurwadza, rimwe racho ndokuzoita zvimwe chetezvo, kusvikira ose azotadza kuona.
“Ndakaenda kuchikoro ndichizvibhadharira ndega nekuzvishandira kusvikira ndanyora bvunzo dzeFomu 4, ndikakunda muzvidzidzo zvangu zvinomwe.
“Ndakazotsvaga nzvimbo kuHarare Polytechnic, uko ndaida kuita construction engineering, ndikawana nzvimbo uye ndikabhadhara mari yaidiwa, ndokutanga chikoro changu zvakanaka. Mukati memasvondo maviri ndatanga zvidzidzo izvi, ziso rangu rekurudyi rakazotanga kuona utsi, richirwadza. Nekufamba kwenguva, rimwe racho rakazotevera, ndokubva ndatadza kuona zvachose,” vanodaro VaTambure.
Vanoti panguva iyi vakaenda kuParirenyatwa Group of Hospitals, uko vakanoongororwa nanachiremba pamwe nekuitwa zvose zvaifungidzirwa kuti zvinobatsira asi dambudziko racho harina kuonekwa.
“Ndakaongororwa maziso aya navanachiremba vashanu vepachipatara ichi, ropa rangu ndokuongororwa zvakare nezvimwewo zvirwere, ndikawanikwa ndakachena. Maziso avhara, ndipo pakaperera sarungano; zvakabva zvavharana, sezvo ndisina kuzokwanisa kuenderera mberi nechikoro. Zvakabuda pachena kuti aya mabasa evakaipa, varoyi veukama, vasingadi kuti ndiite chakanaka,” vanodaro VaTambure, avo vanoti kumusha vanobva kwaSabhuku Tambure, kwaChiendambuya, kwaRusape.
Vanoti iyi inyaya inovarwadza nokuti vamwe vavo vavakasiya kuchikoro vachifambira mberi nezvidzidzo izvi vakatopedza kare sezvo vaifanirwa kupedza mushure memakore maviri.
Murume uyu akafirwa nevabereki vose. Akazoroora dambudziko iri ratanga. Ane mudzimai nevana vaviri.
“Kubva ndasangana nedambudziko iri, hapana chisvinu chakambozoitika kwandiri. Kuzvishandira chaiko handichagoni, mari yekubhadhara rendi handichakwanisi kuiwana. Nokudaro, mudzimai nevana vave kufa nenzara. Takazomboenda kunogara kumusha kwavatezvara, kuNjanja, kwemwedzi mishanu, tikazobva. Izvozvi tiri kugara kwaamainini, munin’ina waamai, kwaMasona, kuno kwaSeke,” vanodaro VaTambure.
Murume uyu anoti hama dzake dzamurasa nokuda kweurwere uhwu pasina achamucheuka.
“Ndinotsvagawo rubatsiro kubva kumaporofita navanachiremba vechivanhu navanachiremba vakadzidzira basa kuti ndibatsirwe kuona. Handina chandichakwanisa kuita; ini nemhuri yangu tave kurarama nekupemha. Dai ndawana bhidhauko rekuita, ndichibatsirwa nemudzimai wangu. Chokudya chaicho hatina,” vanodaro VaTambure.
Vanotenda mudzimai wavo nekuramba akamira navo kunyangwe zvinhu zvakaoma kudai.
“Ndinoda kudzokera kuchikoro, dai meso angu aidzoka zvakare sepakutanga. Ndinotenda mudzimai wangu nekumira neni nokuti dai aive mumwe ainditiza. Maziso angu akavhara nomusi wa11 Kukadzi mugore ra2020,” vanodaro VaTambure.
Vanotiwo munyama wavo wakabvira mugore ra2017, apo vakadyirwa nemakoronyera mari inosvika US$400 yokuti vaende kunodzidzira basa pane imwe kambani.
Mudzimai wavo, Chipo Muringani (23), anoti mararamiro avo anorwadza sezvo ivo nevana vasina pokugara, chokudya nembatya.
“Murume wangu haaoni. Mabasa chaiwo ekuzviriritira haagoni kuaita. Vabereki vangu chaivo vakatidzinga kumusha, kuNjanja. Tigere kumba kwaamwene, amainini vemurume wangu, uye dzimwe hama dzake hadzimubatsiri. Tinoda kubatsirwa mune zvose kuti aone uye kuti tikwanise kuchengeta vana vedu, avo vave kuda kuenda kuchikoro,” anodaro Chipo Muringani.
Kune vanoda kubatsira mhuri iyi, vanovabata panhamba dzinoti 0771 842 929.
Dr Innocent Kundiona, vanove specialist surgeon muHarare, vanokurudzira VaTambure kuti vaende kunyanzvi dzekurapa dzakadzidzira zvemaziso.
VaGeorge Kandiero, vanove mukuru weZimbabwe National Traditional Healers Association (Zinatha), vanoti dambudziko remurume uyu rinogona kunge riine chokuita nemabasa ehushereketwa, euroyi. Vanoti, nokudaro, zvakakosha kuti atsvage nyanzvi dzechivanhu dzinomubatsira.
Mashoko avo anotsinhirwa naPastor Hazvinei Muchefa, vemuHarare, vachiti VaTambure vanofanira kutsvaga rubatsiro nekukasika.
