Murume aponderwa US$2 achinzi ‘akaomera’

NYAYA yekunetsana pamusoro peUS$2, iyo yakange yapihwa mumwe wevanhu vaive vabatsira mutyairi weimwe motokari kuiburitsa mugomba mayaive yawira, yakakonzera kupondwa kwemurume wekwaZimunya kwaMutare uyo akabaiwa nebhodhoro redoro zvakaipisisa nemumwe wake achimupomera hudyire mushure mekunge arega kugovana mari iyi nevamwe.

Mufi, Phineas Hurekure, akabayiwa zveutsinye nebhodhoro redoro rakapwanyika nemumwe wake, Tobias Kutadza, mushure mekunge vaviri ava vabatsira mumwe munhu wavaisaziva kuburitsa motokari yake iyo yakanga yapinda mugomba paMadanhire Business Centre, kwaChigodora.

Mutyairi wemotokari iyi, asina kuzivikanwa kuti ndiani, anonzi akapa US$2 kuna Hurekure sechiratidzo chekutenda kumubatsira kwavaive vamuita izvo zvisina kufadza Kutadza uyo akabva ati anodawo mugove wake pamari iyi.

Hurekure akafa achangopinda muchipatara cheVictoria Chitepo Provincial Hospital sezvo arasikirwa neropa rakawanda mushure mekubaiwa pahuro nechirebvu naKutadza.

Vakafanobata chigaro chemutauriri wemapurisa kudunhu reManicaland, Assistant Inspector Wiseman Chinyoka, vanotsinhira nyaya iyi iyo yakaitika svondo radarika kwaMambo Zimunya.

“Nenguva dza9 manheru, mushakabvu neari kupomerwa mhosva iyi vakanga vachinwa doro paMadanhire Business Centre kwaZimunya, kwaMutare apo mumwe murume aityaira Toyota Corolla yakapinda mugomba raiva pedyo nemuzinda wemabhizimisi uyu,” vanodaro.

Vanoti mutyairi wemotokari iyi akatsvaga rubatsiro kubva kuvanhu vaive panzvimbo yemabhizimisi.

Vanhu gumi, vanosanganisira mushakabvu naKutadza,   vakabva vaenda kunobatsira mutyairi uyu kuburitsa motokari yake kubva mugomba riye.

Asst Insp Chinyoka vanoti mutyairi uyu akazopa US$2 kuna Hurekure sechiratidzo chekutenda nerubatsiro rwavo.

“Kutadza akabva atevera Hurekure uyo akanga aenda kunogara pane rimwe gazebo. Kutadza akapwanya bhodhoro redoro raakanga akabata, ndokubaya Hurekure kaviri pahuro nekamwe pachirebvu. Mufi akaedza kufamba, ndokudonha.

“Kutadza paakaona kuti akanga akuvadza zvakaipisisa mushakabvu Hurekure, akabva atiza. Hama dzemushakabvu, Tendai Hurekure (21) naGift Hurekure (34), vakazoronga zvekumutakura kuti vaende naye kuchipatara. Akatakurwa naSimba Mkwanzini kuendeswa kuchipatara cheVictoria Chitepo Provincial Hospital uko akafa achangosvika,” vanodaro Asst Insp Chinyoka.

Mapurisa akaenda panzvimbo iyi uye akakwanisa kusunga Kutadza ari pamusha waGanje, uyo uri chinhambwe chingangoita mamita zana kubva panzvimbo iyi.

Kuferefetwa kwenyaya iyi kuri kufambira mberi.

Asst Insp Chinyoka vanokurudzira veruzhinji kuti vagadzirise kunetsana kwavo murunyararo pane kuita zvemhirizhonga izvo zvinowanzokonzera rufu.

Vanoti zvakakosha kuti vanhu vatsvage mazano kubva kune vakwegura, vakuru vemachechi pamwe nemahofisi emapurisa anoona nezvekudyidzana neveruzhinji.