Online Reporter
Muchaneta Chimuka
MURUME ane makore 31 okuberekwa akaurayiwa nemhondi mushure mekunge ambobva parufu rwemukoma wake muChitungwiza achienda kunonwa hwahwa pamabhawa ari padyo munguva dzemanheru.
Chiitiko ichi chakasiya vagari vemuChitungwiza vaine kutya kwakanyanya zvichitevera runyararo rwunogara rwuri munharaunda iyi.
Vakafanobata chigaro chemutauriri wemapurisa mudunhu reHarare, Assistant Inspector Faith Mapisa, vanotsinhira nyaya iyi.
Vanoti yakaitika nomusi weSvondo wadarika uye mushakabvu ndiLucky Hlawe.
Asst Insp Mapisa vanoti Lucky anonzi akaenda nedzimwe hama dzake kurufu rwemukoma wake, Thembinkosi Hlawe, kuUnit G, kuChitungwiza.
Vanoti Lucky akazobva panhamo apa nevamwe ndokuenda kunonwa doro kuVelvet Shopping Centre kuUnit O kuChitungwiza kwakare.
“Ari mubhawa, akatadza kunzwisisana nemushandi wemubhawa reVelvet Bar ndokubva vafunga kuchinja nzvimbo ndokuenda kuTaita shopping Centre kuUnit O, kuChitungwiza. Anonzi akazobuda mubhawa asina kuudza vamwe kwaaienda. Muzuva rimwechetero nenguva dza0400hrs, Melhlafane Hlawe nedzimwe hama vakatsvaga Lucky Hlawe sezvo vaida kubva kubhawa asi vakamushaya,” vanodaro.
Asst Insp Mapisa vanoti vamwe vemumhuri vakatanga kumutsvaka uye vave padyo nezvitoro zveTaita shopping Centre vakashamisika kuona chikwata chevanhu vakanga vakaungana padivi pemugwagwa pedyo neMt Moriah AFM kuUnit Unit G.
Pavakaenda panzvimbo iyi, vakaona mushakabvu arere pasi akatofa.
“Melhlafane akanomhan’ara kuZRP Chitungwiza, matikitivha eCriminal Investigations Department vakaenda panzvimbo iyi. Vakawana mushakabvu arere mudivi reropa uye akanga akachekwa zvakadzika kurutivi rwekuruboshwe rwemusoro, muhomwe dzemufi hapana chakawanikwa,” vanodaro Asst Insp Mapisa.
Vanokurudzira veruzhinji kuti vasiyane nemhirizhonga uye kuti vane mashoko anogona kubatsira kuti vapari vemhosva iyi vasungwe vazivise mapurisa ari padyo navo.
