Online Reporter
Kingstone Mapupu
VARUME vatatu vekuSilobela kudunhu reMidlands vakasungwa nemhosva yekuponda mumwe murume mubongozozo rakamuka paainwa doro nemadzisahwira ake apo vatatu ava vakatanga kurova munhu wose aive panzvimbo yemabhizimisi yeko.
Mutauriri wemapurisa kudunhu reMidlands, Inspector Emmanuel Mahoko, vanoti mushakabvu uyu Joseph Chirenje ainwa doro nemasahwira ake panzvimbo yemabhizimisi yekwaParker kuSilobela apo akazobva achienda kunotenga girosari muchitoro cheGwandu General Dealer.
“Murume uyu apo aiva panzvimbo yemabhizimisi iyi, kune varume vanosanganisira Omega Ndhlovu (18), Tafadzwa Sibanda (18), Forget Sibanda (30), Bernard Mpofu naSamson Mhlanga vose vanobva kuVillage 2 kwaParker kudunhu raMambo Ntabeni kuSilobela, vakabva vasvika panzvimbo iyi vaine matanda nemabhodhoro ndokutanga kurova chero munhu wavaisangana naye,” vanodaro Insp Mahoko.
Varume ava vanonzi vairwisa vanhu senzira yekugadzirisa kusawirirana kunonzi kwaiva kwamboitika pakati paMhlanga naChirenje.
Insp Mahoko vanoti mutumbi waChirenje wakazoonekwa uri mukati medivi reropa padyo nedhibhi reko nemusi wa21 Kurume.
“Nemusi wa22 Ndira, chikwata chemapurisa eCriminal Investigations Department (CID) ekuKwekwe vakazowana runyerekupe rwekuti Tafadzwa Sibanda naOmega Ndhlovu vakanga vakwira kombi kubva kuSilobela vachienda kuKwekwe, mapurisa akabva amisa kombi iyi ndokusunga vaviri ava,” vanodaro Insp Mahoko.
Vanoti vaviri ava vakazodurawo vamwe vatatu vanosanganisira Sibanda, Mpofu naMhlanga kuti vaiva vapara mhosva iyi vari vose.
“Mukufambira mberi mekufeewa kwenyaya iyi, kwakazoonekwawo kuchisungwa Forget Sibanda apo Bernard Mpofu naSamson Mhlanga vachiri kutsvagwa nemapurisa. Tinokumbira kuruzhinji kune vane ruzivo nemashoko angaite kuti vari kutsvagwa ava vasungwe,” vanodaro Insp Mahoko.
Vanoti vane zvavanoziva vanogona kuudza mapurisa ari pedyo navo.
