Online Reporter
Arron Nyamayaro
MURUME wekuLupane akawanikwa aine dehwe reshato, muswe webere nemakwande ehaka pamwe nezvidimbu zvenyanga dzenzou muimba yake yekurara.
Nkosilamandla Ncube (40) wemubhuku raFatima, akasungwa ndokuendeswa kudare uko akatongerwa kugara mujeri kwemakore mapfumbamwe nemwedzi mitanhatu.
Mumashoko avo, mutauriri wemapurisa echikamu chematikitivha cheCriminal Investigations Department (CID), Detective Inspector Rachel Muteweri, vanoti: “Mapurisa eZimbabwe Republic Police anotambira nemufaro mutongo wakapihwa Nkosilamandla Ncube, uyo akabatwa nemhosva yekuwanikwa aine zvinhu zvemhuka dzinochengetedzwa pasi pemutemo weParks and Wildlife Act.
“Musi wa28 Nyamavhuvhu, 2025, matikitivha eMinerals Flora and Fauna akatambira mashoko ekuti paive nemurume ane zvinhu zvemhuka dzinochengetedzwa.
“Vakaenda kumba kwemusungwa ndokumuwana aripo.
“Musungwa akatungamirira matikitivha kuenda muimba yake yekurara uko kwakawanikwa dehwe reshato, muswe webere, makwande ehaka nezvidimbu zviviri zvenyanga dzenzou.
“Musi wa16 Gunyana, 2025, musungwa akamiswa mudare reHwange Magistrates Court pamberi pemutongi VaBrighton Matope uye muchuchisi ari Muzvare Makanza. Akatemerwa chirango chekugara mujeri kwemakore mapfumbamwe nemwedzi mitanhatu.
