Online Reporter
Zvikomborero Parafini
MUTONGI wedare reHarare Magistrates’ Court, Tapiwa Kuhudzai, vakati murume wemuHarare – Stanley Marecha – uyo akanhonga mutumbi werusvava uye ndokuzama kuutengesa achiti inyama yemombe, aende kunovhenekwa njere dzake.
Marecha haana pekugara pakati tsvetere uye aitengesa mutumbi uyu muguta reHarare.
Zvinonzi nomusi weChishanu chadarika munguva yeusiku panosangana mugwagwa Rezende naSpeke Avenue, Marecha akaenda kuna Blessed Paradza akabata pepabhegi yepurasitiki hombe yeruvara rwutema.
Marecha akaudza Paradza kuti aitengesa nyama yemombe.
Paradza akamuti avhure aone nyama yacho ndipo paakaona kuti chainge chiri chitunha chemwana mucheche achibva anomhan’ara kumapurisa zvakaita kuti murume uyu asungwe.
Mutumbi uyu wakabva waendeswa kumochari yeParirenyatwa Group of Hospitals uko wakuchengetedzwa apo kuferefetwa kwenyaya iyi kuri kuenderera mberi.
Marecha ari kutarisirwa kudzoka kudare nomusi wa18 Chikunguru mushure mekuvhenekwa kwake njere nemachiremba matatu.
