Online Reporter
Muchaneta Chimuka
VARIMI vokurudzirwa kuti vasiyane nekatsika kekutenga mumikoto mbeu, seyechibage, nemishonga yekufiritisa mbesa, asi kuti vatenge muzvitoro zvakanyoreswa zviri pamutemo.
Kurudziro iyi inotevera kuwanda kuri kuita makoronyera anotengesa zvekurimisa mumikoto mwaka wezhizha zvawaswedera kudai.
Kurudziro iyi yakapihwa nesangano rinorwira kodzero dzevarimi uye zvipfuyo reCropLife Zimbabwe, rakabatana neveZimbabwe Seed Association (ZSA), Animal Health Industry Committee (AHIC) uye makambani anogadzira fetireza, pamusangano wakaitwa muguta reHarare nguva pfupi yadarika.
Musangano uyu waive nechinangwa chekuzeya mamwe ematambudziko anosanganikwa nawo nevarimi uye kuti angagadziriswe sei.
Chirongwa ichi chakaitwa pasi pedingindira rinoti “Kupa ruzivo maringe nemitemo yembeu”.
Vachitaura pachiitiko ichi, Mai Patience Nyakanda, vanove secretary-general weZSA, vakakurudzira varimi nevatengesi vembeu kuti vatevedze mitemo yenyika.
“Munyika mune dambudziko remakoronyera, ayo atori mushishi kupenda mbeu dzakasiyana-siyana, kunyanya yechibage, vachitengesera varimi. Tinoyambira varimi kuti vasiyane nenyaya dzekutenga mbeu yekupimirwa, mungave mumakapu, kana dzavasinganzwisisi, asi kuti vaende kunotenga muzvitoro zvakanyoreswa zviri pamutemo. Muzvitoro izvozvo, makanakira kuti mune madhumeni nevatengesi vembeu, avo vanopanga varimi mazano maererano nemhando dzembeu dzinoenderana nematunhu avo akasiyana-siyana uye vachibvunza zvose zvavanoda kuziva, vachizviwaniswa pachena,” vanodaro.
Mai Nyakanda vanoti vamwe varimi vanoda kutenga mbeu dzemumikoto, vachiti dzakachipa, asi vachizorasikirwa zvakanyanya negoho.
“Makoronyera anongopenda mbeu, oendesa kumisika; haanei nokuti dzakapfukutwa here uye kuti dzichaunza dambudziko ripi kumutengi. Asi zvitoro zvakanyoreswa zvinoita mabasa nemazvo nekuziva kuti vatengi vachadzoka zvakare mwaka unotevera vachida kuzotenga mbeu nokuda kwechivimbo chavanenge vave nacho. Kunyangwe fetireza nemishonga yose yezvirimwa nemhuka zvinofanira kutengwa muzvitoro zvakanyoreswa zviri pamutemo kuitira kuti varimi vasarasikirwe,” vanodaro.
VaKudakwashe Chimwanda, vanove nhengo yeexecutive committee kuCropLife Zimbabwe, vanoti zvirimwa zvinofanira kuchengetedzwa kuburikidza nekuwaniswa manyowa, fetireza nemvura.
“Hazvirevi kuti chirimwa chiri muvhu chinofanira kudiridzwa nechero mvura inenge yawanikwa. Imwe mvura ine michetura inouraya zvirimwa pamwe nekutindivadza ivhu. Kana tichiisa manyowa muzvirimwa zvedu, ngaave akaorera, asina matombo kana tumbuyu twunokuvadza zvirimwa.
“Mishonga yatinoisa muzvirimwa ngaive yakatarwa nemadhumeni kuti inoshanda kuchirimwa chakati uye ngatiedze kushandisa zvipimo zvakatarwa pane kuti chero ndangodira nokuti inogona kusashanda,” vanodaro.
Sachigaro veAHIC, Dr Tafadzwa Chifamba, vanoti zvipfuyo zvinofanira kuchengetedzwa. Vanotizve pane dzimwe nguva apo vanonzwa nyaya dzemombe kana mbudzi dzinonzi dzafa nokuda kwokuti dzinenge dzadya mumunda memunhu akafirita zvirimwa zvake.
“Kune varimi vanofunga kuti zvipfuyo zvinofanira kungovhurirwa zvichidya pose-pose pane mafuro. Kuita kwakadaro kune njodzi. Ndosaka varimi vechichena vaigadzira mapadhoki; yaive nhau yekuona kuti zvipfuyo zvavo zvakachengetedzeka uye zvadya chikafu chaunodzipa iwe muridzi pamafuro aunenge wakagadzira. Zvinorwadza kuti murimi unogona kurasikirwa nezvipfuyo zvinokosha nekutyira kuburitsa mari yekuzvitengera chikafu. Kunyangwe mvura yekunwa, onai kuti madhaira zvipfuyo zvenyu mvura inobva muzvibhorani zvakachengetedzeka. Tine mhuka dziri kupera kufa mushure mekunwa mvura yemunzizi kana madhamu ane muchetura unogona kunge wakadirwa nevavhimi kana vaya vanoita mabasa ezvicherwa, secyanide, torasikirwa,” vanodaro.
Dr Chifamba vanoti kana zvipfuyo zvikachengetedzwa zvakanaka, zvinoita kuti danga renyika rirambe richikura uye zvinosimudzira upfumi hwenyika.
“Muzvirimwa tinowana macarbohydrate, mavitamin, mapuroteni, iron nezvimwe zvinoita kuti tirambe tiine utano. Zvipfuyo zvedu zvakaita sehuku, madhadha, hanga, mombe, mbudzi nehwai zvinotipa nyama, mazai nemukaka. Pamusoro pezvo, zvinogona
kuvandudzwa, zvinobuda mazviri zvichipinda mumisika yemuno neyekunze,” vanodaro.
VaDzidzai Munhutu, vanove murimisi kuZimbabwe Fertiliser Company (ZFC), vanoti varimi vanofanira kutenga fetireza muzvitoro kana kumakambani akanyoresa zviri pamutemo.
“. . . murimi akangwara haangotengi chero fetireza nokuti kune yekudyara nayo neinokudza chirimwa kana inoiswa muzvirimwa zvinoberekera muvhu zvakaita senyimo, nzungu, nembambaira. Fetireza imwe neimwe ine chipimo chakatarwa zvichienderana neuwandu hwezvirimwa uye kukura kweminda asi tinoona vamwe vachingokusha kana kudonhedzera pazvirimwa pasina zviyero, zvinova zvine njodzi yekukuvadza ivhu nokuti rinogona kuvava kana kutapirisa (soil pH),” vanodaro.
