Online Reporter
Kimberley Chitambara
MURUME ane makore 32 okuberekwa wekuBulawayo akamiswa mudare achipomerwa mhosva yekubata chibharo mushure mekunge ashinha nemusikana ane makore 12 okuberekwa uyo pasi pemutemo anonzi haakwanise kunge achibvuma kuita zvepabonde.
Manage Kamuka wemuna 8th Street Makokoba, kuBulawayo akamiswa pamberi pemutongi VaMark Dzira avo vanove Bulawayo regional magistrate achipomerwa mhosva yekubata chibharo sezvinotsanangurwa muchikamu cheSection 65 (1) chemutemo weCriminal Law Codification and Reform Act Chapter 9:23.
Akaramba mhosva iyi achiti akasangana nemusikana uyu mubhawa ndokuenda naye kumba kwake.
Muchuchisi, Muzvare Hazel Ncube, vakaudza dare kuti muna Kukadzi gore rapfuura, musungwa akakumbira rudo kumumhan’ari achibva akabvuma.
Vakatanga kuita bonde kakawanda sevanodanana pazviitiko zvakasiyana. Mumwedzi waMbudzi, mumhan’ari akabva ‘akatizira’ kumba kwemusungwa ndokutanga kugarisana semurume nemukadzi.
Gure iri rakabuda pachena musi wa25 Kukadzi gore rino nenguva dza2:30pm apo Constable Zulu naConstable Singo vaiferefeta imwe nyaya yekuba uye mumhan’ari ndiye aipomerwa mhosva iyi.
Panguva yekubvunzurudzwa kwakaitwa mumhan’ari, zvakaonekwa kuti musungwa akange achishinha naye izvo zvisingatenderwe nemutemo.
