Online Reporter
Muchaneta Chimuka
MUZVINABHIZIMUSI wekuChitungwiza uyo anove chizvarwa chekunyika yeChina – Huang Ping (64) – akamiswa mudare nemhosva yekuda kuuraya mumwe werudzi rwake waanoita bhizimisi naye nezibanga remubhucha mushure mekunge vanetsana.
Huang ari kupomerwa kuda kuuraya Duan Bingeng (63) apo vaiita musangano wezvebhizimisi mumahofisi avo.
Ari kutongwa pasi pemutemo weAttempted Murder as Defined in Section 47 (1) ARW Section 189 (1) of the Criminal Law Codification and Reform Chapter 09:23.
Huang, uyo ari kumiririrwa negweta rake rekambani yeG. Sithole Law Chambers, ari kurambisisa mhosva iyi.
Duan ari kumirirwawo negweta rake reHamunakwandi & Nyandoro Law Chambers.
Nyaya iyi yakapinda mudare nomusi weChitatu svondo rino.
Muchuchisi Munyaradzi Karimazondo, uyo ari kubatsirana kufambisa nyaya iyi nemumwe wake – Tawananyasha Chelsea Chiwae – akaudza dare kuti nomusi wa11 Kubvumbi gore rino munguva dzemanheru, vaviri ava vakaita musangano maringe nebhizimisi ravo vari mumahofisi ari panhamba 19831 Tilco Industries muChitungwiza.
Vari mushishi kuita musangano uyu, zvinonzi pakamuka kusanzwanana izvo zvakaona musungwa achitora banga remubhucha achibva acheka Duan kaviri mumaoko ayo aiedza kuvhika nawo uye kamwechete pagumbo rake rekuruboswe zvakaita kuti akuvare zvakanyanya.
Duan akapihwa mubhedha muchipatara akarapwa kukuvara uku uye magwaro ekwachiremba akabudiswa mudare seumbowo.
Banga rinonzi rakashandiswa mukupara mhosva iyi riri kutarisirwa kuzobudiswa mudare sehuchapupu.
Huang achadzoka kudare munguva pfupi iri kutevera apo anenge achibva kunze mushure mekupihwa bhero
Mutongi munyaya iyi ndiVaAlois Midzi.
