Online Reporter
Intatheli kaMthunywa
KWEHLE iyezi elimnyama kwenye imuli yeHeadlands ngemva kokuba intombazana eleminyaka yokuzalwa emine iwe yahle yafa ihamba lonina lezelamani zayo ngeviki ephelileyo.
Isehlakalo lesi esitshiye izakhamizi zitshaqekile senzakale ngoLwesithathu ngeviki ephelileyo.
Omele isikhulumi samapholisa esabelweni se Manicaland uAssistant Inspector Wiseman Chinyoka, uqinisekise lesi sehlakalo wathi kulenina ebelihamba labantwabalo abathathu laselisizwa abanye abantwana ababili bethi omunye wabo usewile.
“Mhlaka 8 Ntulikazi eBerthel Cop Business Centre eKubatana eHeadlands, uJuliet Mashereni, owesifazane oleminyaka engu-36, wayehamba esuka eGazaland Private College lapho asebenza khona njengomfundisi, esiya ekhaya eKubatana Business Centre lezingane zakhe ezintathu ezileminyaka engu-6, 4, le-1 ubudala,” utsho njalo.
“Sekusele amamitha ambalwa nje ukuthi bafike ngekhaya inina leli elalihamba phambili abantwana besemuva lezwa ingane yalo eleminyaka engu-6 imemeza ithi indodakazi yalo eleminyaka engu-4 isiwile.
“Wayibona ilele phansi ngesisu sayo, inganyakazi. Unina wazama ukuyiphakamisa ememeza, kodwa ayisabelanga. Wazisa umkakhe, bagijimisa intombazana esibhedlela, lapho okwafikwa kwathiwa umntwana usedlule emhlabeni.
“Kwenziwa umbiko eZRP Headlands amapholisa ahle aya endaweni yesehlakalo. Isidumbu sathathwa saya emotsha yesibhedlela seRusape General Hospital, lapho esilinde ukuhlolwa. Uphenyo luyaqhubeka.”
