Online Reporter
Munyori weKwayedza
ZIMBABWE iri kuita ongororo yekuona kuti mhando itsva yechirwere cheCovid-19 – iyo yakanyuka kuSouth Africa – yakapinda here munyika muno panguva iyo Hurumende iri kushanda pamwe chete nesangano reWorld Health Organisation muchirongwa chekutenga mushonga wakatenderwa wekudzivirira kupararira denda iri.
Bazi rezvehomwe yenyika rakaisa padivi US$100 miriyoni yekutenga mushonga wekudzivirira Covid-19 kuburikidza nekubaya majekiseni kuchikamu che60 percent chevanhu vari munyika muno.
Svondo rapera, Dr Raiva Simbi – avo vanove Deputy Director of Laboratory Services mubazi rezveutano nekurerwa kwevana – vakati pane fungidziro huru yekuti mhando itsva yechirwere cheCovid-19 yakanyuka kuSouth Africa iri kutenderera muZimbabwe.
“Hongu, tinotsinhira kuti pane mhando itsva yechirwere ichi chiri kutenderera muvanhu, asi hapasati pave neumboo hunotaridza izvi kubva kuongororo,” vanodaro.
Covid-19 chirwere chine mipanda yakawanda inonzi inogona kusvika 30 000.
Vakafanobata chigaro chemunyori mukuru mubazi rezveutano nekurerwa kwevana, Dr Robert Mudyirandima, vagara vachiratidza kushushikana nenzira dzakasiyana dzekuedza kurapa varwere veCovid-19 vachiti panofanirwa kuve nenzira imwe chete kuitira kuti pasave nenyonga-nyonga.
“Izano rakanaka, inhau yatagara tichishungurudzika nayo sebazi rezveutano nekurerwa kwevana uye tichiita hurukuro kuti vanhu vari kungorapwa nenzira dzose-dzose.
“Pari zvino hapana nzira yakawiriranwa pasi rose yekurapa Covid-19 saka pane zvakawanda zviri kutaurwa asi panguva ino tinofanirwa kuve nenzira yakajeka yatinoti ndiyo inotevedzwa (Covid-19 treatment kit) nevanhu vose vatiri kuti vaende kudzimba, pamusoro pematanho ekudzivirira denda iri,” vanodaro.
Zvakawanda zviri kutaurwa maringe nekurapwa kwevarwere veCovid-19 kusanganisira kushandiswa kwemishonga yechivanhu.
Nguva pfupi yadarika, sangano reMedical and Practitioners Council of Zimbabwe rakapa yambiro kune veruzhinji kuti vangwirire vamwe vanhu vari kuti vanokwanisa kurapa chirwere ichi.
Online Reporter