adminUMDLALI wenguqu uLionel Messi utshele abalandeli bakhe ukuthi uzaqeda umnyaka ka-2016 edlalela iqembu leBarcelona.
Umbiko kaMessi lo uvale wonke amahungahunga athi umdlali lo ubeselubhekise eNgilandi lapho obekukhangelelwe ukuthi athengwe yiManchaster City kumbe iManchaster United.
Ebika ngemva kokuthola umvuzo wakhe wesihlanu owe-Ballon d’Or ngoMvulo, uMessi uthe: “Ngifuna ukuphumelela ngidlalela iBarcelona. Lesi ayisiso sikhathi sokuthi sikhulume ngekusasa yami. Kuqakathekile ukuthi siqine ngokunqoba lokusebenza gadalala.
“Sengakutsho kanengi ukuthi angifuni ukusuka kuBarcelona. Ngifuna ukuqeda umdlalo wami ngisekhaya. Ikhaya lami yiBarcelona. Ngomnyaka odluleyo bekuthiwa sizadliwa, kodwa siqede sinqobe imidlalo eminengi. Inhloso yami yikuqeda lapho engaqala khona, kuBarcelona,” nguMessi othe ekhuluma wathola ukuqakezelwa kwaphezulu kumkhosi we-Ballon d’Or.
UMessi uqede isizini ka2015 enqobe kunkezo zeChampions League, iCopa del Rey, Uefa Super Cup leClub World Cup.
Ngesizini le uMessi udlale kumidlalo engamatshumi ayisithupha lanye, wahlohla amabhola angu-52, wancedisa ukuphasa amabhola ahlohliweyo angu-26 waphakamisa inkezo ezinhlanu.
Unikezwe isicoco seBallon d’Or ngemva kokuvotelwa ngabadlali, abaqeqetshi lentatheli zenguqu umhlaba wonke.
Isicoco seBallon d’Or yiso esibekwa phezulu kulazo zonke kumdlalo wenguqu. Abanye abadlali abancintisane loMessi kumavoti eBallon d’Or nguNeymar loCristiano Ronaldo oweReal Madrid. — Ubulembu
Online Reporter