adminGamuchirai Muzanenhamu
NYAYA yekutsabvurirana murume yakaparadzanisa hushamwari hwaive pakati pemadzimai maviri uye vakazopedzisira vasvitsana kumatare edzimhosva.
Rosemary Ikwanda akaendesa Evernice Madhuveko kuHarare Civil Court achida kuti amiswe kumutuka, kumutyisidzira nekuenda kumba kwake pose paanoshaya murume wake.
“Mukadzi weaimbova murume wangu, zvino pose paashaya murume wake kumba kwake, anouya kumba kwangu achindituka nepahwindo remba achiita ruzha achideedzera mashoko anonyadzisa,” anodaro Ikwanda.
Anoti Madhuveko haabvume kuti haachadanane nemurume wake.
“Haanzwisise kuti ndakarambana nemurume, ndosaka ari kuita mhirizhonga neni,” anodaro.
Ikwanda anoti Madhuveko aiva shamwari yake yepamwoyo, asi zvakapera nekuti akadanana nemurume wake mazuva aakaenda kumusha izvo zviri kuita kuti afunge kuti vachiri vose.
“Uyu aiva shamwari yangu yepamwoyo. Pandakaenda kumusha murume wangu achisara, ndipo pavakadanana vakamboita sevarambana pandakadzoka asi kunyepa nekuti ndinovaona vari vose,” anodaro.
Madhuveko anoti anoenda kunoita ruzha kumba kwaIkwanda nekuti anenge ava kurohwa nemurume.
“Murume wangu akabva kumba kwake anenge aine hasha achindirova, hameno zvaanenge amuudza saka ndizvo zvinoita kuti ndiende kumba kwake ndichiita ruzha naye nekuti anoziva zvakawanda pamusoro pangu. Ndinenge ndisisazive kuti ataura nezvei,” anodaro Madhuveko.
Mutongi Tafadzwa Miti akapa Ikwanda gwaro rerunyararo.
Online Reporter