Online Reporter
Ethel Ncube
KWEHLA inyembezi ezihlathini zabalandeli bomculo weqembu leNsimbi zeZhwane kusedlula emhlabeni u-Elvis “Ma Eli” Mathe lomunye uThembinkosi “MaViri” Mpofu, engozini yomgwaqo ngo2023.
Khathesi sekuyiminyaka emibili bekhunjulwa laba abantu. Kalisoke lakhohlakala ilanga likamhlaka 5 Ncwabakazi ngalowo mnyaka, kusehla iyezi elimnyama kuqembu leNsimbi Zezhwane.
Kusukela ngempelaviki, amakhasi ezokuxhumana ebulenjini abesegcwele ngamazwi enduduzo kukhunjulwa abaculi laba. Abalandeli bomculo abakuleli labaphetsheya baqhubeka ngokubeka amazwi enduduzo la, bekhuthaza imuli zabomuyi ukuthi zithembele kuNkulunkulu lokuthi iqembu kumele liqhubeke ngokujabulisa uzulu.
Ukwanda kwamazwi enduduzo kwamukelwe ngazo zombili yilabo abasele bephethe iqembu. Intatheli ixhumane lomaneja weqembu uBahlanu Sibanda obike ukuba lokhe besizwa ubuhlungu.
“Nxa kufika umhlaka 5 Ncwabakazi inxeba liyavuka kutsha, imbuzo iyaqala phansi ukuthi kanti kwahamba njani kuze kudlule uMa Eli loMaviri langa linye. Silokhu sisizwa ubuhlungu enhlizweni, ngani sizababona ngelinye ilanga bethutsha. Mina ngelanga ezadlula emhlabeni sakhuluma sonke ecingweni, lalamuhla imilayezo yakhona lokhe ngiyigcinile ngilayo nxa ngiyibala ngizwa inyembezi zisehla,” kubika uSibanda.
Uphinde waveza ukuba ukufa kwadalwa, impilo kumele iqhubeke.
“Bengabe batshona abafowethu kodwa udumo lwabo akumelanga lutshabalale.Umculo sizaqhubekela phambili ngawo, sisebenza gadalala ukuze ungafi njalo sizabe siyibambile indazi, ikhala kuze kuyevalwa.
“Sibonge kubalandeli lakubafowethu abasemculweni lapha ngokusithumela amazwi asiqinisayo ngelanga okwatshona ngalo abafowethu, lokhu kutshengisa ukuthi abafowethu babethandwa nguzulu wonke”.
Omunye usaziwayo kwezomculo u-DJ Mapressa ubike ukuba kuzahlelwa isikhumbuzo sikaMa Eli loMaViri.
“Kuzahlelwa isikhumbuzo sokudlula kukaMa Eli, sizahlala phansi kwenziwe isikhumbuzo sakhe, wonke umuntu uzabe ezangena emcimbini mahala ukuze kungabi lamuntu osala phandle wonke umuntu abephakathi.
“Sibonga kwabancedisayo kunkosikazi kaMa Eli osowafundela ikhosi yomsebenzi wezandla kuthi ke umntwana owasala engakazalwa, kuleqembu elilokhe lisagcine umntaka Ma Eli kuthi lo ofundayo inkampani yeKingdom lokhe isaqhubeka imncedisa.Kubuhlungu nxa sikhumbula indlela abafowethu abasitshiya ngayo kodwa ke kungasenani phumulani ngokuthula madoda ikatari lokhe ikhala isiyaphambili singeke salilibala lapho elilele khona,” kutsho uDJ Mapressa.
