Online Reporter
Lovemore Dube
AMALUNGA uqobo eqembu leHighlanders azahlangana lenkokheli mhlaka 17 Ncwabakazi egumeni leClub House elikuFife Street loMasotsha Avenue.
Lumhlangano wenziwa minyaka yonke ngoNtulikazi kumbe ngoNhlangula. Ubizelwa ukuthi iqembu lihlolisise ukuthi inyanga eziyisithupha ezedluleyo kusetshenzwe njani enkundleni lasemahofisini.
Kusaziso esifakwe kuphephandaba leSunday News kuviki edluleyo, iqembu lithe kuzabuthanwa ekuseni mhlaka 17 Ncwabakazi eHighlanders Club House. Libika njalo ukuthi kuzakuba lesethulo sombiko kamgcinisihlalo uKenneth Mhlophe.
Kuminyaka edluleyo umhlangano lo ubunikeza amalunga ithuba lokuthi azwe ngokwenzakala eqenjini lokuthi abalembono labo bagcizelele, kube lesinqumo esithathwayo kukhangelelwe ukuthi kukhuliswe iqembu.
Lonyaka kukhanya kuzaba lokuxokozela lokuxhophana amehlo ngoba iqembu kalenzi kuhle njalo abalandeli basebuhlungwini ngokungathengwa kwabadlali abalohlonzi lobanje kulenkamapani ezimbalwa ezathembisa ukuncedisa iHighlanders.
Kulokukhonona ngokuthi iqembu kungani lilosekelo kodwa akucaci ukuthi imali zakhona ziyangaphi kumbe zisemaphepheni, kungela okuzampompoza njengesithembiso.
Okunye okukhona kungathi akusetshenzwa kuhle phakathi kwequla le-executive lebhodi.
Sekuvele njalo ukuthi kuzakhulunywa ngobusela obucatshangelwa ukuthi benziwa emahofisini njalo kulokukhonona ukuthi kulenziye inkokheli lezisebenzi ezifuna ukumbambatha insolo lezi.
Lokhu kungenza iqembu lisebenze nzima. Onceda ezemidlalo kakaze athande lapho okuxokozela khona kumbe okungacaci ukuthi imali zisebenza njani.
Iqembu lalahlekelwa nguBrian Moyo owetheswa icala lokuthi wayengabe etshayele esikhewini imali engcolileyo kuthengwa abafana ababili beqembu leBulawayo Chiefs.
Umgcinisikhwama uNkani Khoza ukhangelelwe ukuthi laye uzakuthi vuu, ethule owakhe umbiko.
Lokhu kukhangelelwe ukuthi kuzenza umhlangano uvuke, abantu beyiphathe esegudwini ukuthi imali kungani azihambi kuhle njalo labasekela ngemali bazathiya indlebe.
Iqembu kusaziso esiphumileyo lithe amalunga angaphosela imbono engayakhulunywa kwakhiwe.
derick.khumalo