Online Reporter
Bhekimpilo Tshalibe
INKAMPANI ye-Charles Steward Day-Old Chicks ethengisa amatsiyane omhlobo wama-broiler isixwayise abalimi abafuye inkukhu lezi ukuthi baqaphele umkhuhlane we-Newcastle ngoba uyingozi futhi ulakho ukuthanyela isilugu sonke.
UMnumzana James Chinembiri ongu-Poultry Production Specialist esabelweni seMatabeleland kunkampani yeCharles Steward Day Old Chicks ukhuthaze abalimi abafuya inkukhu zomhlobo wama-broiler ukuthi beqaphele umkhuhlane weNewcastle ngoba uyingozi futhi ungabulala inkukhu zonke esilugwini.
“Umkhuhlane we-Newcastle ungena ngomquba wenkukhu kungakho sikhuthaza labo abafuye inkukhu ukuthi babone ukuba izilugu zabo zihlala zihlanzekile,” kutsho uMnu Chinembiri.
Uthe kulento ezinengi ezimemethekisa lumkhuhlane.
“Kulezinto ezimemethekisa umkhuhlane okumele abalimi bazinanzele ezigoqela; ingcekeza yenkukhu elomkhuhlane, kungaba zinkukhu ezisuswa kwesinye isilugu zisiyangeniswa kwesinye, inyoni, amagundwane, impahla esetshenziswayo kunye labantu.
“Sikhuthaza abalimi ukuthi bengangenisi abantu ezilugwini zabo ukuze bengangeni lemikhuhlane phakathi njalo babone ukuthi izilugu zabo zivalekile, akungeni nyoni lamagundwane, njalo bengahlalisi amathuluzi ezimota esilugwini senkukhu,” kutsho uMnu Chinembiri.
Uthe kulendlela umkhuhlane lo obonakala ngawo enkukhwini.
“Umkhuhlane weNewcastle ubonakala ngokutshilana kwentamo yenkukhu njalo lokuhuda ingcekeza elombala oluhlaza, ukukhwehlela kanye lokuphefumula nzima kwenkukhu,” kutsho uMnu Chinembiri.
Uthe umkhuhlane weNewcastle uyelapheka.
“Umkhuhlane weNewcasltle uyelapheka njalo sikhuthaza abalimi ukuthi benike inkukhu zabo umuthi okuthiwa yi-vacciblue njalo bewufake emanzini benathise inkukhu ukuze zivikele kulo umkhuhlane,” kuphetha uMnu Chinembiri.
