Online Reporter
Nkosilathi Sibanda
INHLANGANISO yeZimbabwe Pickleball Association (ZPA) isikhethe uSister Claris Gowo, ukuba abengu mmeli wayo ngenhloso yokuqinisa ukukhula komdlalo emphakathini lokukhuthaza intsha ukuthi iphile impilo engcono.
Umongameli weZPA, uMthandazo Ngwenya, uthe ukungena kukaSister Gowo kutshengisa ukuthi inhlanganiso ibona ezemidlalo njengeqhinga lokwakha, ukufundisa intsha lokulondoloza amalungelo ayo.
“Ukukhethwa kukaSister Claris Gowo kusekelwa yinhloso yethu yokhulisa umidlalo wethu, ukunakekelwa komphakathi lokwakha isizwe esilobuntu,” kutsho uNgwenya.
Uthe uSister Gowo ulembali ende ekusebenzeni labantwana, intsha labantu abaswelayo, okuyikho okumenza afanele umsebenzi lo.
“Sifuna inkundla ze-pickleball zingabi zindawo zokudlala kuphela kodwa zibe zinkundla eziphephileyo lapho abantwana lemuli abangahlangana khona, bafunde impilo enhle lokuziphatha okuhle,” kutsho uNgwenya.
Uthe uSister Gowo uzasebenza njengommeli weZPA ekhuthaza ukubambana kwemuli, ukuthuthukiswa kwentsha lokusabalalisa umdlalo ezabelweni zonke zelizwe.
“Phezulu kwalokho, uzanika ubukhokheli benhlanganiso izeluleko esebenzisa ulwazi lwakhe lwezemfundo. Uleziqu zeMBA kwezokuvikelwa kwabantwana labantu abasengozini lePhD
kwezokuhlolwa lokuqinisekiswa kwesisindo kwezemfundo.”
UNgwenya uthe okujabulisayo yikuthi uSister Gowo wamukele umsebenzi lo ngokuzithandela, engafuni isikhundla, ngoba efuna ukusebenzisa ezemidlalo ekwakheni umphakathi ongcono.
