adminSANGANO reZimbabwe Medical Students Association (ZIMSA) rakatanga chirongwa chekufamba mumayunivhesiti nemakoreji richipa vadzidzi ruzivo maererano nekukosha kwakaita kuchengetedza utano hwavo.
ZIMSA, rinove sangano rakaumbwa nevadzidzi vepaUniversity of Zimbabwe, riri kunyanya kudzidzisa pamusoro pezveutano hwesikarudzi (sexual and reproductive health) pasi pechirongwa chinonzi Imunzi Project.
Mukuru wesangano iri, Auxilia Govera, anoti vakatanga chirongwa ichi mushure mekuona kuti ruzivo pamusoro pekuchengetedza utano rwuri kuperevedza kuvadzidzi vekumayunivhesiti nemakoreji.
“Vadzidzi vemumakoreji pamwe nemayunivhesiti vanofanirwa kuva neruzivo rweutano, zvikuru utano hwesikarudzi,” anodaro Govero.
Anoti donzvo resangano ravo nderekuvandudza ruzivo rwevadzidzi ava panyaya dzeutano pamwe nekuti vazive pavamire maringe neHIV neAids kuburikidza nekuongororwa ropa.
“Isu tiri kushanda takabatana nesangano reUnited Children of Africa pamwe neDanish Medical Students mukuvandudza ruzivo rweutano rwevadzidzi,” anodaro Govore.
Anoenderera mberi achiti vanoita misangano nevadzidzi ava vachivapanga mazano.
“Izvi tinozviita kuti vazokwanisa kudzidzisawo vamwe munharaunda dzakavapoteredza nekwavanogara,” anodaro Govore.
Online Reporter