Online Reporter
Abel Ndooka
VAIMBI vechitendero vechidzimai vesangano reZimbabwe Female Gospel Artist Association (ZFGAA) vachasangana kuBulawayo musi weMugovera uno vachishumira vhangeri nekuridza nziyo dzekurumbidza Mwari.
Chirongwa ichi chichaona vaimbi vari muboka iri vachitenderera neZimbabwe yese pamwe nekuenda kunze kwenyika vachiita mashoo.
Svondo rino, ZFGAA ichange iri kuBulawayo uko vaimbi vanosanganisira Pastor Hetisani Mharidzo, Dr Precious K, Mai Mwamuka, Minister Lindani, Abigail Mwembe naLihle Dube vachaimba nekuparidza vhangeri raJehovha.
Muhurukuro neKwayedza, mutungamiri wesangano iri – Pastor Mharidzo – vanoti vakaronga chirongwa ichi nechinangwa chekubatanidza vaimbi vechidzimai.
“SeZimbabwe Female Gospel Artist Association, takavamba chirongwa ichi apo tiri kufamba mumapurovhinzi ese tichiita mashoo.
“Izvi tiri kuzviita nekuti chekutanga, tinenge tichishumira nekuparidza vhangeri raMwari kuburikidza nemhanzi uye chechipiri, tichipanana mukana wekusimukira sevaimbi vechitendero,” vanodaro Pastor Mharidzo.
Chirongwa ichi chakatanga svondo radarika apo vaimbi vekwaMutare vakasangana vakaita shoo yavo.
