Online Reporter
Kingstone Mapupu
VANHU vatatu vakasungwa kuShurugwi kuMidlands nemhosva yekubira vanhu mari nehukopokopo izvo zvakaona vachiba mari inosvika US$17 009-50 neZiG30 665912-30.
Vakasungwa ndiTranos Taurai Muzanenhamo (27), Rumbidzai Tsongora (24) naBradwell Shangwa (25) nekuda kwemhosva yavari kupomerwa yekuita hukopokopo vachibira vanhu kumativi mana enyika.
Mutauriri wemapurisa munyika, Commissioner Paul Nyathi, vanoti vatatu ava vaitanga vatsvaga mazita evanhu vachishandisa masaisai uye vaizokumbira vanhu ava kuti vavaudze mashoko anosanganisira mararamiro avo nekuvakumbira maSim Card avo vachiti vanoda kuvapa matsva.
“Nekudaro vaibva vawana mashoko emafambiro anoita mari dzevanhu ava dzemumabhanga akasiyana, vowanawo manhamba emakaundi emabhanga nemaWhatsApp Profiles evanhu nekutora mari dzavo mumabhanga nekukumbira zvakare mari kuvanhu ava,” vanodaro Comm Nyathi.
Vanoti nemusi wa31 Gumiguru gore rino, mapurisa eZRP Shurugwi vakashandisa hunyanzvi hwebasa ravo kutevera maguruvhani aya ndokunovasunga kuShurugwi vakavanda mune imwe lodge.
“Motokari yavo yavaishandisa yerudzi rweToyota Mark X pakutiza yakazotsvagiwa ikawanikwa umo makazoonekwawo muine makechemu kana kuti simbi dzemapurisa uyewo nezvitupa zvevanhu vakasiyana zvenhema, maSim Card, nhare dzakawanda nemichina yeStarLink,” vanodaro Comm Nyathi.
Vatatu ava vanonzi vane mhosva dzinokwana 29 dzavakapara dzine chekuita nekuba vachishandisa hukopokopo uye vakaba mari inosvika US$17 009-50 neZiG30 665912-30. Mhosva idzi dzinonzi dzakaparwa kunzvimbo dzinosanganisa Bulawayo, Harare, nekune mamwe maguta akatsaukana.
“Nyaya iyi iri kufambira mberi nekufeewa pachitarisirwa kuti pachabuda mhosva dzakawanda dzakaparwa nevanhu vatatu ava,” vanodaro Comm Paul Nyathi.
