adminKAMBANI yeLafarge Cement Zimbabwe iri kusimudzira utano hwevashandi vayo vechidzimai zvichitevera kuvaka kwayakaita dzimba dzekuti vanhukadzi vakwanise kuyamwisa vana pamwe nekuchengetera mukaka panguva iyo vanenge vari pabasa.
Vachitaura nguva yadarika vari kumuzinda wekambani iyi, chamangwiza wayo, Mai Amal Tantawi, vanoti zvakakosha kuti utano hwevanhukadzi husimudzirwe mumabasa.
“Takabatana nebazi rinoona nezveutano nekuchengetedzwa kwevana, kambani yeLafarge Cement Zimbabwe takavaka dzimba dzekuti madzimai ayamwisire vana nekuchengetera mukaka,” vanodaro.
“Takaita tsvakiridzo tikaona kuti vanhukadzi vanoyamwisa vange vasiri kupihwa kodzero dzavo dzizere mumabasa uye vamwe vaipedzisira voyamwisira vana vavo muzvimbuzi, nzvimbo dziri pachena panenge paine mhepo kana huruva. Saka ndizvo zvakaita kuti tivakise dzimba idzi.”
Vana vanoyamwiswa ava vanenge vauya sezvakaita nevasikana vebasa vanosevenzera madzimai anoshandira kambani iyi.
Vanoenderera mberi vachiti chishuwo chavo kusimudzira utano hwevanhukadzi mumabasa.
“Vana amai vanhu vakakosha chaizvo saka sekambani tine magwaro emutemo ayo anotsigira madzimai akazvitakura kusvika panguva yavanoenda kunobatsirwa zvakare nemwedzi yavanogara kumba vachichengeta vana kusvika pakudzoka kubasa,” vanodaro Mai Tantawi.
Vanoti dzimba dzekuyamwisira idzi dzine zvinosanganisira mafiriji ekuisa mukaka, pekugara pakanaka uye chipatara chiri pedyo.
Online Reporter