adminARSENE Wenger anoti achaedza kutenga vatambi vemhando yepamusoro mwaka unotevera apo chikwata chake chakakunda cheHull City 3-1 mumutambo weMonday Night Football.
MaGunners akatora zvibodzwa zvitatu kunhandare yeKC Stadium apo pakanwiswa naAlexis Sanchez kaviri pamwe naAaron Ramsey ukuwo Stephen Quinn ndiye akanwisawo kumaTigers.
Kuhwina kwakaita Arsenal kunoreva kuti haisati yambokundwa mumitambo 10 yadarika uye Wenger anofunga kuti chikwata chake chicharwisana necheChelsea mumukombe weligi gore rinotevera.
Asi anoti kana afunga zvekutenga mumwe mutambi anofanirwa kunge ari wemhando yepamusoro.
“Tine chikwata chihombe, chinotamba nhabvu inodakadza. Hatifanirwe kungotenga vatambi vakawanda,” akadaro Wenger.
“Kana tikawana vatambi vemhando yepamusoro, tichavatarisa, asi iye zvino tine chikwata chakakura uye tinoda kuramba tiri tose kutanga kwemwaka unotevera.
“Ndinoona kuti tiri kufamba mugwara chairo. Chelsea yakakodzera kuhwina gore rino nekuti iri kutamba nhabvu inodakadza kudarika zvimwe zvikwata zvose.
“Tinoda kupedza zvakasimba, totanga kuita gadziriro dzekutanga mwaka mutsva tozotanga zvine mutsindo.” Chimwe chikonzero Arsenal yange iri kutamba zvinonwisa mvura matambiro aAlexis Sancez uyo akatengwa kubva kuBarcelona mwaka uno. Chizvarwa chekuChile ichi chakanwisa kechi16 mumutambo uyu neHull, Wenger ndokuti ari kushamiswa zvikuru nekunwisa kuri kuita mutambi uyu. “Hongu ndaitarisira kuti aizobatsira vamwe kunwisa pane kuti iye ange achinwisa kudaro sezvo ndagara ndichimutambisa kudivi reflank uko kwausingawane mikana yakawanda yekunwisa,” akadaro Wenger. — Sky Sports News.
Online Reporter