Online Reporter
Muchaneta Chimuka
SANGANO reWorld Food Programme, rakabatana nereUnited Nations Population Fund (UNFPA), vosimudzira raramo yevagari vekumaruwa kuburikidza nekuvatsigira kuti vaite mabhindauko ekurima mapindu emiriwo (nutritional gardens), izvo zviri kuvawanisa raramo pasi pechirongwa cheResilience Building Programme.
Izvi zvakaziviswa svondo rapera muguta reHarare apo painyoreranwa pasi chibvumirano pakati peUNFPA neWFP chekubatanidza homwe nezvekushandisa mukubatsira vanhu vanotambura kumaruwa — zvikuru sei madzimai nevana.
Danho iri richaita kuti veruzhinji kumativi mana enyika vawaniswe chikafu, zveutano hwesikarudzi pamwe neruzivo rwekurwisa mhirizhonga panguva imwe chete.
Vachitaura pachirongwa ichi kumahofisi avo muHarare, Muzvare Mirinda Tabifor, vanova mumiririri wesangano reUNFPA munyika, vanoti kubatana uku kuchabatsira kuti vanhu vawaniswe rubatsiro panguva imwe chete.
“Tinoziva kuti panzvimbo inogoverwa vanhu chikafu panowanda vanhu, saka tichatora mukana uyu mukuwanisa veruzhinji mashoko edzidziso maringe nekurwisa mhirizhonga mudzimba; nzira dzekurera mhuri; kurapwa kwavo zvirwere zvepabonde nekuwaniswa dziviriro, ingava nzira yemakondomu nedzimwe nzira dzeutano. Saka tichatanga nekubatsira vanhu munyaya dzeutano, tobva tavapa chikafu nekuti chakakosha zvikuru mukusimudzira utano hwemhuri,” vanodaro.
Vanoti UNFPA sesangano rinoona nezvekodzero dzeutano hwemadzimai, vanasikana nevana, vanoona zvakakosha kuti vawaniswe kudya kunovaka muviri kuitira kuti miviri yavo ikwanise kudzivirira zvirwere.
“Kunyorerana pasi kwechibvumirano uku inzira yekuwandudza mashandiro edu pamwe chete nekuti takagara tiri sangano rinoshanda neWFP kubva mugore ra2016 apo taifamba munharaunda, muzvipatara nemakiriniki tichiwanisa madzimai akazvitakura chikafu nezvekushandisa apo vanenge vakarindirira kumatumba (maternity waiting homes) ari pedyo nezvipatara, vachigadzirira kubara.
“Kubva munguva yechirwere cheCovid-19 munyika muno, taibatsira madzimai nezvekushandisa tichitsigira utano hwekuyaruka nekuti vazhinji vainge vakaomerwa vagere mudzimba pasina mabasa avaikwanisa kuita nekuda kwezvirongwa zvelockdown, izvo zvairambidza kufamba kwakanyanya kwevanhu senzira yekuderedza kupararira kwechirwere ichi,” vanodaro.
Muzvare Tabifor vanoti kuwaniswa kwevanhu vekumaruwa chikafu kuri kuramba kuchienderera mberi. Munguva pfupi yadarika, WFP yakabatana neveZimbabwe Family Planning Council mukuwanisa vagari vekuBuhera chikafu uye nzira dzekurera mhuri, zvinova zviri kusandura raramo yemadzimai.
Mumiririri wesangano reWFP muZimbabwe, Mai Barbara Clemens, vanoti kubatana kwemasangano aya achiita chisungo chimwe chete chekubatsira ruzhinji kwakakosha munyaya dzebudiriro yeupfumi hwenyika.
“Tichagara pasi tichinzvera kuti tingatanga nematunhu api uye vanhu vakaita sei vangawaniswe rubatsiro urwu. Tichange tichipa chikafu chakadai semafuta, bhinzi, chibage, hupfu nezvimwe zvinoita kuti mhuri dzirarame nekuti takatarisa chimiro chemwaka wekurima wadarika, vanhu vakawana goho ravo riri nani asi hatingati rainge rakakwana nekuda kwekuti mune mamwe matunhu zvirimwa zvakaoma, zvipfuyo zvakapera kufa nekushaya mvura uye zvirwere zvakanyanya kukonzerwa nenyaya dzekusanduka kwemamiriro ekunze,” vanodaro.
Masangano aya ari kushanda nesimba mukutsigira zvinangwa zveHurumende zvinoendeka zvemaSustainable Development Goals (SDGs), zvikuru sei SDG 2, ine donzvo rekurwisa nzara; SDG 3, inovavarira kusimbaradza utano nekurarama kwakanaka kwevanhu; uye SDG 5, inokoshesa kuenzaniswa kwemikana pakati pemadzimai nevanhurume.
Faith Dube, uyo anova nutritionist kuWFP, anoti vari kudzidzisa vanhu vari munharaunda kuti varime mapindu emiriwo kuitira kuti vasangomirira rubatsiro rwunobva kuvatsigiri pasi pechirongwa cheResilience Building Programme.
“Patinopa vanhu chikafu nekuvadzidzisa zveutano, tinovakurudzira kuti vashandise zviwanikwa zviri munharaunda dzavo kuti vave vanhu vanogona kuzviraramira vega pasina kumirira chikafu chekugoverwa bedzi. Tinovafundisa kurima miriwo yakadai seminyemba, manhanga, chibage nezvimwe zvirimwa zvidiki zvinotirira zuva pamwe nekuchengeta zvipfuyo, tichitsigira zvirongwa zveHurumende zvemabusiness units, izvo zviri kubatsira vagari vekumaruwa kuti vave neraramo yakaenzana nevamwe vavo vari mumaguta,” anodaro.
