Online Reporter
Munyori weKwayedza
MASHOKO achangobuda ari kuti dehenya iro rakawanikwa mazuva mashomanana mwana wekwaMurehwa, Tapiwa Makore Jnr (7), achangobva mukupondwa nderemusoro wemwana uyu.
Tapiwa Makore (Jnr) akapondwa munaGunyana gore rapera, mutumbi wake ndokunhongwa usina musoro, maoko nemakumbo.
Mukuferefetwa kwenyaya iyi nemapurisa, pakazowanikwa mimwe mitezo inosanganisira chanza cheruoko, makumbo ayo ainge akakandwa muchimbuzi ikoko kwaMurehwa nedehenya remusoro.
Pakazotangwa ongororo dzekuda kuona kuti mitezo iyi inowirirana here nemutumbi uyu zvikabuda zvichiti makumbo nechanza cheruoko ndezvaTapiwa Jnr apo ongororo dzedehenya dzaifambira mberi.
Zvino zvinonzi ongororo dzazoburitsa kuti dehenya iri – iro rainge rakatokonorwa zvose maziso, muromo nenzeve – nderemusoro wemwana wekupondwa uyu.
Panotove nevanhu vane chitsama vakasungwa nekuda kwekupondwa kwemwana uyu avo vari kusanganisira babamukuru mukoma wababa vake uye sazita Tapiwa Makore Snr (57) nemufudzi wake wemombe Tafadzwa Shamba pamwe chete naThanks Makore.
Kubva gore rapera papondwa mwana ange achidzidza pachikoro cheNyamutumbu Primary School uyu, mutumbi nemitezo yakawanikwa hazvisati zvavigwa uye vemhuri yekwaMakore vari kuronga kumurongedza kupera kwemwedzi uno.
Mutauriri wemapurisa munyika, Assistant Commissioner Paul Nyathi, havasati vataura pamusoro penyaya ino.
Zvakawanda zviri kutevera.
Online Reporter