admin
ZVIKWATA zvezvikoro nemakirabhu zvemitambo yakasiyana zvekuChitungwiza zvinotarisirwa kukwikwidza munguva pfupi iri kutevera mumakwishu eChitungwiza Youths Sports Gala.
Makwikwi aya anosanganisira netball, volleyball nenhabvu ari kurongwa nesangano reChitungwiza Youths Sports Academy uye anotarisirwa kuzoitwa musi wa30 Kubvumbi.
Volleyball nenetball zvichatambirwa paChitungwiza Town Centre kozoti mimwe yose ichaitirwa paNyatsime College.
Nhengo yekomiti yeChitungwiza Youths Sports Academy (CHIYSA), Brian Kandemiri, anoti mitambo iyi ndeye kubatsira kuumba matarenda evatambi vechidiki vari kusimukira muChitungwiza.
“Tiri kuedza kusimudzira mitambo yakasiyana muChitungwiza ndosaka tiri kuronga mitambo yakadai.
“Tine Academy yedu muChitungwiza iyo tiri kusarudza vatambi vakasiyana vachipinda kuburikidza nemitambo iyi avo tichazoshanda navo tichibika matarenda avo kusvika vatengwa nezvikwata zvakasiyana,” anodaro Kandemiri.
Mumutambo wenhabvu, zvikwata zvisere ndizvo zvichakwikwidza kozoti 15 zvichatatsurana kuvolleyball ne10 zvenetball.
“Mutambo uyu wakavhurika kuzvikwata zvese zvingade kuuya kuzokwikwidza, basa redu chete kusimudzira matarenda evechidiki.
“Tine varairidzi vedu vakamirira kuzoongorora vatambi vazhinji pamutambo uyu uye kana vane vavaona vavanenge vafarira vachapinda muAcademy yedu yeCHIYSA umo vachazoshanda navo vachivadzidzisa zvizere zvemitambo iyi,” anodaro.
Kandemiri anoenderera mberi achiti parizvino sangano ravo riri muhurukuro nemakambani akasiyana kuti akotsvere mitambo iyi.
Online Reporter