adminAmager Mufema
MWANAKOMANA wekumiswa mudare nenyaya yekusikiza amai vake demo pamwe nekuvamonya ruwoko achiramba kutumwa anoti haazive kuti chii chinenge chamugara paanoita izvi.
Sinodia Savanhu akaendesa mwanakomana wake, Malcon Savanhu (18), kuHarare Civil Court achiti upenyu hwake huri parumananzombe.
Akaudza mutongi wedare kuti: “Handizive kuti kubereka imhosva here, ndashaiswa rugare nemwana wangu wamunoona uyu. Haandione saamai vake.
“Ndikamutuma anoramba obva atora demo otanga kundisikiza naro achiti, ‘Ndokuuraya mukadzi iwe’ uye anondimonya ruwoko. Ndiko kusaka ndapotera kuno kudare, kuti mundipewo gwaro redziviriro,” akadaro Sinodia.
Akaenderera mberi achiti ave kugara achityira upenyu hwake nekuda kwezvinoitwa nemwanakomana wake.
“Ndave kutogara ndichityira upenyu hwangu nekuti zviito zvemwana uyu chokwadi vedare mukasatora matanho ndinofa rakacheka nyika. Ndinokumbirawo dare rindipe mvumo yekuti mwana uyu ndimudzinge atsvage hake kumwe kwekugara nekuti ini handikwanise kugara nemhondi,” akadaro Sinodia.
Malcon haana kupokana nezvaitaurwa naamai vake achiti haazive kuti chii chinenge chamugara paanoda kuvatema nedemo.
“Handipokane nezvose zvataurwa naamai vangu, zvose ndinozviita asi handizive kuti chii chaizvo chinondibata kuti ndisvike pakuita zvinhu zvakadai,” akadaro Malcon.
Mutongi Barbra Mateko akapa Sinodia gwaro redziviriro ndokuti Malcon anofanira kuchengetedza runyararo pamwe nekuterera amai vake.
Online Reporter