Online Reporter
Muchikamu chino, vaverengi, vateveri veKwayedza nevamwe vanotsigira bepanhau iri vari kupihwa mukana wekubvunza zvimwe zvezvinhu zvinoshamisa, zvisinganzwisisiki nezvakasiyana-siyana zvinonetsa pachivanhu mumararamiro evatema uye vachipindurwa nenyanzvi.
Mubvunzo
Ndaverenga pamwe chete nekunzwa nyaya dzakawanda dzezvidhoma kana kuti zvikwambo, izvo zvinonzi zvinoshungurudza voruzhinji uye zvichikonzerwa nekuromba kana kuti uroyi. Ndinoda kuziva kuti chii chinombonzi chidhoma? — T. Musambakurima, Goromonzi.
Mhinduro
Chidhoma kana kuti chivanda imhuka kana kuti chinhu chinoshandiswa nevaroyi pakuita mabasa avo ekukuvadza kana kuuraya vanhu.
Iyi imweya yevanhu vakafa inotorwa kumakuva.
Chidhoma chinonzi chinogadzirwa nemishonga nen’anga kana kuti ivo varoyi.
Kazhinji, chidhoma chinogadzirwa nemweya yevana vadiki vakafa. Mweya iyi inoshandurwa, ichiitwa zvidhoma. Izvi ndizvo zvinoita kuti zvidhoma zvizhinji zvitaure sezvinoita vacheche.
Kunewo zvidhoma zvechikuru. Izvi zvinomutswa pachishandiswa mweya yevanhu vakuru seharahwa, izvo zvinoonekwa zviine husvisvi hwendebvu.
Zvidhoma zvinogadzirwa kubva kumweya yevana vadiki zvine hasha dzakanyanya kana zvichienzaniswa nezvinogadzirwa nemweya yevanhu vakuru.
Panongofa munhu, varoyi vanobva vatora mweya wake asati avigwa, voushandisa kugadzira zvidhoma.
Chidhoma nechikwambo zvinoda kufanana nokuti zvose zvinogadzirwa nemweya yevanhu vakafa.
Asiwo zvakakosha kuziva kuti kushandisa zvidhoma kwakaipa zvachose sezvo kuchizokonzera matambudziko makukutu mumhuri uye hazvina kumbosiyana nekupara ngozi sezvo zvichipedza rudzi.
Ndinovimba T. Musambakurima nevamwe mabatsirika nemhinduro iyi.
Kune zvavanoda kunzwisisa, nyorerai kuna Bvunza Godobori panhamba dzeWhatsApp dzinoti +263 0774 132 838.
