adminDAVID Mahungo, murume wekwaSeke, akamiswa pamberi pedare reChitungwiza Magistrates’ Courts nemusi weChipiri svondo rino achipomerwa mhosva yekuponda.
David akatarisana neimwezve mhosva yekuparadza midziyo.
Akamiswa pamberi pemutongi Lazarus Murendo, uyo akati adzoke zvakare kudare nemusi wa21 Zvita apo anenge ari muchizarira. Akanzi kana achida bhera anokumbira kudare guru reHigh Court.
Magwaro anorondedzera mhosva ayo ari mudare iri anoti David akaita hurukuro nevamwe vanakomana vemumhuri yavo nemusi weSvondo apo vaikurukura pamusoro penyaya dzehuroyi mumusha mavo.
Dare rakaudzwa kuti pahurukuro idzi, David nevamwe vake vakazonanga mushakabvu, babamukuru wavo Musekiwa, vachiti ndiye aikonzera matambudziko avaisangana nawo.
Vakabva vatorana ndokuenda kumba kwemufi ndokunomuudza kuti aiva nezvikwambo izvo zvaikonzera kutambura kwavaiita.
Dare rakaudzwa kuti David nevamwe vake vakabatsirana kurova nekupisa Musekiwa vachimuti muroyi.
Vanonzi vakapisa mushakabvu uyu nemoto mushure mekunge vamurova nenduni nezvimwe zvombo zvakasiyana izvo zvakaita kuti afe pakarepo.
Nyaya iyi yakazomhan’arwa kumapurisa zvikaita kuti David asungwe.
Muchuchisi munyaya iyi aive Tatenda Mukatera. – The Herald.
Online Reporter