adminVADZIDZI kubva kuzvikoro zvinosvika 25 zvepuraimari nesekondari zvemuHarare svondo rapera vakawana mukana wekuratidzira matarenda avo mumitambo yakasiyana pasi pechirongwa cheAnnual School Festival.
Muhurukuro neKwayedza, mukuru anoona nezvechirongwa ichi, Mai Chido Musasiwa, vanoti zvakakosha kuti vana vechikoro varatidze matarenda avo mumitambo yakaita semadhirama, mbakumba kana Jerusarema.
Vanoti gore rino makwikwi aya akaitwa pasi pedingindira rinoti, “My journey begins now” iro rinokurudzira kusimudzirwa kwemitambo.
“Donzvo redu nderekuti vana varatidze matarenda avo, vasanyare nekuti vamwe ndipo panobva raramo yeremangwana ravo, kunyanya kune vaye vasingakwanise zvekunyora nekuverenga mabhuku,” vakadaro Mai Musasiwa.
Vakawedzera vachiti vanasikana vanofanirwa kutsigirwa mune zvemitambo.
“Vanasikana vanoda kusimudzirwa mune zvemitambo kuti varatidze matarenda avo. Mumitambo iyi, vana vanenge vachidzidzisana zvakasiyana zvakaita sekupanana chenjedzo pamusoro pezvirwere zvakaita seHIV neAids, matambudziko avanosangana nawo kana vakapinda muwanano vasati vabva zera nezvimwe,” vakadaro.
Online Reporter