Online Reporter
Muchaneta Chimuka
SANGANO reZimbabwe Youth Council (ZYC) rinoti rakanyoresa makambani anosvika 1 800 munyika yose ayo achange achitungamirirwa nevechidiki sedanho rekuona kuti vawaniswa mabasa, zvikuru munguva ino apo nyika yakatarisana nedenda reCovid-19.
VaBrain Nyagwande, avo vakafanobata chigaro chemukuru weZYC, vanoti zvakakosha kusimudzira raramo yevechidiki sezvo vari ivo vatungamiriri vemangwana.
“Kana tichitaura kuti vechidiki tinoreva vanhu vane makore anobvira pa15 kusvika 35 ekuberekwa. Munguva ino yeCovid-19, vana vechikoro kunyanya vakavhiringwa zvikuru nekuda kweCovid-19 apo vakanga vasiri kuwana zvidzidzo nezvimwe zvakakwana, nekudaro vamwe vakapedzisira votora zvinodhaka kana kuswera vachitamba. Tinoda kuti vechidiki vawane zvekuita muupenyu nekuti ndivo hwaro hwebudiriro yenyika,” vanodaro.
VaNyagwande vanotenda rutsigirwo rwavanowaniswa neHurumende apo inokoshesa kodzero dzevechidiki zvichifambirana nechikamu cheSection 20 chebumbiro remutemo wenyika.
“Cde (President) Mnangagwa vane chido chekusimudzira nyika kuburikidza nevechidiki vanova vakabata ramangwana. Sangano reZYC riripo kusimudzira vechidiki uye ndiro rinotaura nhunha dzavo dzichiendeswa kumapazi akasiyana eHurumende kuti dzigadziriswe.
“Pari zvino takanyoresa makambani 1 800 kuti vechidiki vawane mabasa akati tsvetere,” vanodaro.
Pasi pechirongwa cheNational Youth Policy of Zimbabwe, Hurumende ine chinangwa chekusimudzira vechidiki kuti nyika ikwanise kuzadzikisa zvinangwa zvayo zveNational Development Agenda mugore ra2030.
Online Reporter