Online Reporter
Muchaneta Chimuka
MWANAKOMANA ane makore 16 okuberekwa vekuChitungwiza anonzi akavharirwa mumba kwemakore matatu achinyimwa zvokudya nababa vake vachibatsirana nemudzimai wavo izvo zvakazokonzera kuti apedzisire ave kudya tsvina yake.
Mwana uyu (zita rake tinaro asi tinorichengetedza nekuda kwezera rake) anonzi atanga kuvharirwa mumba umu aine makore 14 ekuberekwa uye chikonzero chekuita izvi hachisati chazivikanwa.
Baba vake vane makore 45 okuberekwa nemudzimai wavo, avo vose vanogara kuSt Mary’s kuChitungwiza, vakatomiswa mudare nemhosva yekushungurudza mwana uyu.
Mutongi Dennis Mangosi veChitungwiza Magistrates’ Court vakati vaviri ava vadzoke kudare munguva pfupi iri kutevera apo kutongwa kwenyaya iyi kuri kuenderera mberi.
Muchuchisi Shamiso Charmaine Mwapangira vakaudza dare kuti kubvira mugore ra2022 kusvika nomusi wa6 Chivabvu gore rino, baba ava nemudzimai wavo vaivharira mwana uyu mukamuri yemba ine tsvina vachimurambidza kufamba kana kumuwanisa chikafu.
Vanonzi vaimunyima chikafu zvekuti akasvika pachidanho chekudya tsvina yake nemamwe marara aaingonhonga mumba maainge akavharirwa umu zvakonzera kuti awondoroke zvakanyanya.
Dare rakaudzwa kuti vaviri ava vakashaya mwoyo wekubereka apo vakakundikana zvekare kunyangwe kumuendesa kuchipatara mushure mekuona kuti utano hwake hwainge hwaderera zvikuru.
Munguva zhinji, baba ava nemudzimai wavo vanonzi vaisiya mwana uyu ari mumaoko asisi vake ane makore 23 okuberekwa, anova munhu asingakurumudzi kubata zvinhu.
Hutsinye hwavo uhwu hunonzi hwakakanganisa mwana uyu pautano hwake nehwepfungwa sezvo akashungurudzika zvakanyanya apo vaimubata hunhapwa kunge musungwa.
Vaviri ava vari kutongwa pasi pechikamu chemutemo unoona nezvekuchengetedzwa kwevana (ill – treatment or neglecting of children and young persons as defined in Section 7 (1) of the Children’s Act Chapter 06).
Nyaya iyi inodyidzana neimwe yakamboitika munharaunda imwe chete apo mumwe mudzimai wekuZengeza, uyo anopinda chechi yechipositori, akavharira mwanakomana wake, Grant Mashasha, mumba kwemakore 14 azere.
Gure iri rakazofumurwa neveruzhinji zvakaita kuti mudzimai uyu asungwe ndokuzoendeswa kumatare edzimhosva.
