admin
KUNOTSVA demo kugosara mupinyi svondo rino neMugovera pamwe neSvondo kunhandare yeNational Sports Stadium muguta reHarare uko kuchatambirwa mitambo mina yeChibuku Super Cup quarter-finals.
Zvikwata zvisere zvinoti Chicken Inn, Chapungu United, Harare City, Triangle United, ZPC Kariba, How Mine, Dynamos FC uye neFC Platinum ndizvo zvasara mumutambo uyu uye zvose zvichatamba pamazuva maviri aya zvichirwira kupinda musemi-fainari.
Mugovera
Chicken Inn vs Chapungu United
Mumutambo wekutanga uchatambwa musi weMugovera na1pm uchaona chikwata chaJoey Antipas cheChicken Inn kana kuti Gamecocks icho chiri kutungamira muPremier Soccer League chichibandana neChapungu iyo inozivikanwa nezita remadunhurirwa rekuti Waru Waru.
Chikwata chaAntipas chinofanirwa kuzviziva kuti mitambo yeligi neyemikombe zvakasiyana saka chinotosunga dzisimbe kuti chifambire mberi mumutambo uyu.
Harare City vs Triangle United
Mumutambo wechipiri wemusi weMugovera uyo uchatambwa na3:30pm uchaona maSunshine City Boys achitatsurana neTriangle FC, Boys dzeShuga. Varairidzi zvezvikwata zviviri izvi Taurai Mangwiro weHarare City naKelvin Kaindu weTriangle United vanoziva kuti muligi havasisina mukana wekuihwina saka chasara kwavari kurwira mikombe yakaita seChibuku Super Cup iyi.
Svondo
ZPC Kariba vs How Mine
Zvikwata izvi zvose parizvino zviri kutatarika mumitambo yeligi uye varairidzi vazvo havana hope nekuda kwematambiro azviri kuita.
Svondo rino zvicharwa semvumba kuti zvigofambira mberi kupinda musemi-fainari yemutambo uyu.
Dynamos vs FC Platinum
Zvikwata zviviri izvi pazvakapedzisira kusangana svondo radarika DeMbare yakazorwa ‘butter’ mumutambo weligi apo yakakundwa 3 -1.
Svondo rino DeMbare ichange ichida kutsividza FC Platinum asi zvichange zvakaoma nekuti Platinum iri kurwira kuchengetedza mukombe wayo wayakahwina gore radarika.
Online Reporter