adminDaphne Machiri
GURUKOTA redzidzo yepuraimari nesekondari, Dr Lazarus Dokora, vanoti vari kutora matanho akakodzera kuti zviri mugwaro idzva rekuvandudzwa kwefundo, reNew Education Curriculum, iro rinokoshesa kudzidziswa kwemabasa emawoko muzvikoro, zvinge zvichizadziswa.Vaitaura pakuparurwa kwechirongwa chekudzidzisa vechidiki mabasa ekurima, cheFit for Life Young Farmers Club Empowerment and Entrepreneurship Project Phase Two, paKanyemba Secondary School iri kuChiweshe.
Chirongwa ichi chiri kutsigirwa nebhanga reBarclays pamwe nesangano rinomirira varimi, reZimbabwe Farmers Union.
Barclays yakapa $206 000 kuchirongwa ichi iyo inotarisirwa kubatsira vechidiki vanosvika 17 000 kuti vasimukire mumabasa ekurima.
“Kuvandudza mabasa emawoko muzvikoro kwakanakira kuti mune remangwana kunopa chouviri kune avo vasingakwanise zvekunyora nekuverenga zvakare nevanosiira chikoro panzira.
“Tichabatana nesangano reZimbabwe Famers Union muchirongwa chekudzidzisa vana vechikoro kuti vave neruzivo nezvinodiwa mukuita basa rekurima sezviri muNew Education Curriculum, iyo inokoshesa kudzidziswa kwemabasa emawoko muzvikoro,” vanodaro Dr Dokora.
Vachitaura pachiitiko ichi, VaSam Matsekete, avo vanove mukuru wezvemari weBarclays Bank, vanoti donzvo ravo nderekusimudzira vechidiki nekudaro vacharamba vachitsigira chirongwa ichi. ZFU president, VaAbdul Nyathi, vanoti vanotambira nemawoko maviri mushandirapamwe pakati pesangano ravo nebazi redzidzo yepuraimari nesekondari mukudzidzisa vana vechikoro nezvekurima.
Online Reporter