admin
VANA vepaNyambiri Secondary School, kwaSeke, vari kusimukira muzvidzidzo zvemabasa emawoko zvinosanganisira kurima izvowo zviri kuita kuti chikoro ichi chiwane mari.Kwayedza yakashanyira chikoro ichi ndokuwana vamwe vana veForm 2 neForm 4 vari mushishi kutengesa muriwo, matomatisi nehanyanisi.
“Pachikoro chedu tine chidzidzo chemabasa emawoko chezvekurima saka tinoti zvatinenge tafunda muzvikoro tinonozviita kumunda izvo zvinobatsira kuti tikure tichigona kushandisa mawoko. Vamwe vanogona kuda kuita madhumeni, varairidzi vezvekurima kana vanamuzvinabhizimusi vane mapurazi.
“Tinotengesa zvimwe zvezvatakarima kubindu rechikoro kuti tiwane mari inoshandiswa mune zvakasiyana sekuendesa kumitambo yemuzvikoro kana kunoona nzvimbo dzinoyevedza,” anodaro Yollanda Gumbajera (17) uyo ari muForm 4.
Anoti vanodzidziswa zvakare kuti chose chinenge chatengwa chinofanirwa kunyorwa mumagwaro kuti vaone mafambiro ebasa ravo.
Brighton Mushure (16) uyo ari kuita Form 2, anoti kurima kwakakosha nekuti ndiko hwaro hwebudiriro.
“Ini ndinoda kuzoita murimi mukuru kana ndichinge ndapedza chikoro nekuti munhu wose anoda kudya saka zvichaita kuti ndiwane vatengi vakawanda pagoho rangu,” anodaro.
Mukuru wevana (headboy) pachikoro ichi, Smart Mukwereri (18), anorumbidza zvidzidzo zvemabasa emawoko achiti zvakakosha zvikuru.
“Kusimukira kwechikoro kunobva kuvadzidzi nevarairidzi. Saka mabhindauko aya haapereri mudzidzo bedzi kuti vana vapase asi inhaka huru,” anodaro.
Anoti mari iri kuburwa mukutengesa zvirimwa iri kubatsira zvakare dzimwe nherera dziri kunetseka kuwana mari dzechikoro.
Online Reporter