admin
Daphne Machiri
GURUKOTA redzidzo yepuraimari nesekondari, Dr Lazarus Dokora, vanoti pari kudiwa mari inosvika $15,7 miriyoni yekuti chirongwa chekuvandudza dzidzo (New Education Curriculum) chinge chichibudirira mukufambiswa kwacho gore rino.
Vachitaura nevakuru vezvikoro kwaRusape, kuManicaland nguva pfupi yadarika, Cde Dokora vanoti dare reCabinet rakatenderana pamusoro pechirongwa ichi uye chasara chete kuti chichitanga kufambiswa.
“Mari inodiwa kufambisa chirongwa chekuvandudza syllabus yesekondari inosvika $15,7 miriyoni. Zvidzidzo izvi zviri kuvandudzwa pachikosheswa zvemabasa emawoko zvinova zvinosimudzira upfumi hwenyika nekuvapo kwemabasa kwemakore manomwe anotevera. Tichabatsirwa zvakare nevemakambani akazvimirira pamwe neHurumende mukutsvaga mari iyi,” vanodaro.
Cde Dokora vanoti zvidzidzo izvi zviri kuvandudzwa zvichienderana nechirongwa chekusimudzira upfumi hwenyika, cheZim-Asset.
Takanangana nechirongwa cheZim-Asset chinova chinoita kuti nyika ive nevanhu vanokwanisa kuzvishandira vapedza chikoro, zvinova zvichaunza kuvhurwa kwemaindasitiri, mikana yemabasa nekusimudzira upfumi hwenyika,” vanodaro Dr Dokora.
Vanoti bazi ravo richatenderera mumatunhu ose enyika richipa chenjedzo pamusoro pechirongwa chekuvandudza zvidzidzo ichi.
“Hatisi kudzokera shure mukuvandudza dzidzo sezvo dzidzo iri nhaka yeupenyu zvakare vechidiki ndivo vatungamiri vemangwana,” vanodaro.
Online Reporter