Online Reporter
Muchaneta Chimuka
MURUME ane makore 23 okuberekwa wekuChitungwiza wekuita shanje dzerudo zvekusvika pakucheka sikarudzi yeshamwarikadzi yake nebanga mushure mekumuona ari mumotokari nemumwe murume uyo aifungidzira kuti chikomba chake akatongerwa kugara mujeri kwemwedzi 18 izere.
Mutongi wedare reChitungwiza Magistrates Court, Alois Midzi, vainge vateremera Innocent Sean Jiyengwa chirango chekugara mujeri kwemwedzi 24 asi vakazomubvisira mwedzi mitanhatu nechitsidzo chekuti haafaniri kupara imwe mhosva rerudzi urwu makore mashanu asati adarika.
Jiyengwa (23) akabatwa nemhosva yekukuvadza shamwarikadzi yake, Kuzivakwashe Dzimba (25), wekuUnit L kuChitungwiza kwekare.
Akatongwa nemhosva yemhirizhonga (Contravening Section 3(1) (a) ARW Section 4(1) of the Domestic Violence Act, Chapter 5:16).
Muchichisi VaMalvin Mwendera vakaudza dare kuti nomusi wa29 Zvita muna2024 munguva dzemanheru, Jiyengwa akaona Dzimba agere mumotokari nemumwe murume achibva ashatiriswa nazvo.
Jiyengwa akatsvetukira pamusoro pebhoneti remotokari ndokupwanya girazi repamberi nehasha.
Murume aive mumotokari umu akamutendera kuti apinde mukati asi akabva atora mukana uyu kuzvambaradza Dzimba nezvibhakera nemambama.
Jiyengwa akazoenda naDzimba kumba uko akaenderera mberi nekumurova.
Akazocheka chidimbu chenyama yesikarudzi yake achishandisa banga remumba.
“Mushure mekundibvisa mumotokari akanditi tiende kumba kwangu uko akasvikondirova nemidziyo yemumba yakadai semapoto, pani nemacheya epurasitiki. Pedzezvo, akanditi ndirare ndakatarisa mudenga achibva acheka imwe nyama yesikarudzi yangu. Ndiri kurwadziwa zvikuru uye kushungurudzika mundangariro nekuti vanhu munharaunda vave kutonditi ndiri pfambi inodhumanisa varume,” anodaro.
Dzimba anoti murume waaive naye mumotokari ishamwari yaJiyengwa yainge yamuvigira jaketi rake iro akakanganwa pazuva reKisimusi.
“Ndakatozopunyuka kubva pandainge ndirere mushure mekuchekwa apo Jiyengwa akabuda panze kunotsvaka mumwe mudziyo wekuti andizvindikite nawo ndichibva ndanomhan’ara nyaya iyi kumapurisa,” anodaro.
Anoti Jiyengwa akabvarura hembe yaainge akapfeka achibva asara aine mutodo chete uye akamubira US$193 yake yaive pasi pemubhedha.
Magwaro ekukuvara kwakaita Dzimba, kusanganisira mifananidzo yaakatorwa achangobva mukukuvadzwa, akabudiswa mudare seumbowo.
Jiyengwa akabvuma mhosva yake yekurova mumhan’ari.
“Mhosva yekuti ndakarova mumhan’ari nemaoko uye chimuti ndinoibvuma asi mari yake handina kuitora,” anodaro Jiyengwa
