Online Reporter
Kingstone Mapupu
MWANAKOMANA wemuimbi aiva nemukurumbira muchakabvu Tongai ‘Dhewa’ Moyo, uyo ane zita rababa vake, anoti atambura kuti awane vanomubatsira kutsikisa dambarefu rake idzva iro akatopedza kunyora.
Tongai Obert Moyo (Jnr) (27) anogara mumusha weEye Court kuWaterfalls, muguta reHarare uye munin’ina wemuimbi Peter Moyo.
Anoti mumhuri yavo mune vanakomana vatatu sezvo kune mumwe mudiki kwaari anonzi Tanaka Moyo anoridzawo magitare.
“Pakafa baba, ini ndaiva mudiki ndichiita Grade 7 mugore ra2011 asi ndaifamba nababa ndichiridza madrums. Mukuru wedu ndiPeter Moyo, kuchizotiwo kumashure kwangu kunaTanaka Moyo (22) uye tose tinoita zvekuimba. Dambudziko randaita ndiri kushaya mari yekutsikisa dambarefu rangu idzva iro rakatopera,” anodaro Tongai Moyo (Jnr).
Anoti pakashaika baba vavo mugore ra2011, vaigara kuMasasa kuKwekwe uye akabva azobva ikoko ava kugara naamaiguru vake kuEye Court uko ari kuita basa rekuvaka.
“Ndakazoenderera mberi nechikoro kuno kuHarare ndokuzotanga zvekuimba mugore ra2016 apo ndakabatana naBryn Samaita ndikaita single inonzi Dhewa Vedu yandairangarira baba vangu. Ndakazoburitsa imwe single mugore ra2020 inonzi Dzinza Rinokosha iyo ndakaita naRonnie Mudhindo, mugore ra2022 ndakaita single naChief Hwenje inonzi Chingoziva,” anodaro Tongai Moyo (Jnr).
Anoti akatsikisawo dambarefu mugore ra2022 iro rine nziyo inonzi Mbinga, kotevera Mai Moyo, Tsoka Yerudo, Titambe Ngoma, Dhewa Venyu naUriko kanova kemusambo weRhumba uyewo kaine mavhidhiyo maviri.
Tongai Moyo (Jnr) anoti parizvino ari kukwenenzvera dambarefu rake idzva rinonzi Shumba DzemuAfrica rine nziyo nhanhatu iro raari kutsvagira mari yekuti atsikise.
“Dambarefu idzva iri ndakapedza kunyora ndikaita zvose zvinodiwa, chasara kuwana mari yekunotsikisa chete iyo ndinokumbira kumasahwira ababa vangu nevamwewo vane tsiyo nyoro. Mukoma Peter Moyo havasi kundibatsira, pamwe kuomerwawo hamheno. Dzimwe nyaya dzemudzinza tinotaura kwete zvekubasa rekuimba iri, hatina chatinotaura chinofambira mberi, pamwe kutya ‘competition’ hamheno,” anodaro Tongai Moyo (Jnr).
Anoti munin’ina wake, Tanaka, ari kugara kuKwekwe naambuya vake uko ari kuitawo zvemumhanzi.
“Sezvo tichingova vakomana vatatu vaTongai ‘Dhewa’ Moyo uyewo nevasikana vana (4), ishungu dzangu kuti rimwe remazuva tibatane sevana vaDhewa toridza tose mhanzi yababa vedu inova nhaka yatakasiirwa, tosimudzira zita rababa vedu. Izvozvi ndinoita basa rekuvaka iro ndakangodzidzira ndoga ndaona kuti ndakanga ndava kufa nenzara. Ndine chikwata chakazara chevanoridza mhanzi ndichishandisa zita rekuti Utakataka Express Four By Four (4×4),” anodaro Tongai Moyo (Jnr).
Muimbi uyu, uyo asati aroora, anoti ane dambudziko guru rekuti haana magitare nezvimwe zvekuridzisa zvakaita semadrums nePA system.
“Zvekuridzisa ndinoita zvekuhaya, fungai US$250 pazuva, zvinodhura zvekuti imwe nguva haugone kudzosa mari yawahaisa yacho. Saka chikumbiro changu kana paine vanogona kunditengera zvekuridzisa, ndine shungu dzekusvika padanho rakasvikawo baba vangu,” anodaro.
Anoti vakagumisira kuita shoo munaMbudzi gore rakapera.
Tongai Moyo (Jnr) anoti chido chake chekuimba chakazosimbiswa nababa vake kunyangwe zvazvo kuchikoro aiva mukwaya.
“Ndinotenda vose vanonditsigira vaishanda nababa vangu vanosanganisira Perfect Mateu nevamwewo,” anodaro Tongai Moyo (Jnr).
Zvakadai, Peter haana kukwaniswa kubatika panharembozha yake kuti ataurewo pfungwa dzake nekuda kwedambudziko rakatarisana nemunin’ina wake.
